一連兩場的「王菀之我來自火星08演唱會」前晚在九龍灣StarHall舉行尾場，有不少圈中人捧場，包括何韻詩和劉浩龍、及曾傳姊弟戀的余文樂和車婉婉。
「做乜望我嗰度」
當王菀之穿上白色低胸裙和曾傳緋聞的張敬軒合唱《我願意》，唱畢Ivana笑問軒仔：「你做乜望住我嗰度？」軒仔直言：「你今日好勁，嗰度太顯眼。」軒仔又承諾：「如果你遇到乜嘢困難，有乜頭暈身㷫，打個電話嚟我立即過嚟。」之後軒仔更錫了Ivana左右面頰，全場即時起哄。
許志安出場時望着身穿藍色露肩裙的Ivana上圍，並且「哇」了一聲，Ivana笑說：「你哇嘅時候做乜嘢望呢個位？」安仔稱：「我望你個look咋，原來火星look係咁。」
父母上台晒唱功
Ivana父母又上台和愛女合唱《AmazingGrace》，本身是歌唱世家的王父王母和Ivana齊晒唱功，唱畢王父模仿中國領導人大聲說：「Ivana繼續努力向前。」王母在旁搞笑說：「大家係咪好似去咗北京？」當台上播出Ivana兒時照片時，她即感觸落淚。
事後問到Ivana穿上低胸裙甚有睇頭，引得軒仔和安仔出言調戲，她說：「佢哋客氣啫，我冇加墊，不過宮廷衫都有啲托嘅。」Ivana又表示軒仔並非首次見她父母，大家已見過數次。談到軒仔如此力撐，是否以行動表示愛你？Ivana甜絲絲說：「佢對我好，但愛唔愛就唔知。」Ivana又表示自己上次致電給張學友請他做嘉賓，和他對話時竟緊張得語無倫次。
採訪：駱華齡
攝影：葉君海