財爺鬍鬚曾呢排都幾頭痕，雷曼事件、東亞擠提全部開正佢個瓣，日前滙豐裁員又關佢事。不過鬍鬚曾今次明顯有啲後知後覺，早排通脹高企時，佢第一時間撲出嚟做預言家，話通脹有望放緩，但噚日畀人問起裁員潮，佢仲要𠵱𠵱哦哦一輪先話估計喺經濟放緩下，金融業嘅裁員潮陸續有來。其實人哋業界早幾日已經講咗啦，仲有人預測明年初係裁員高峯期㖭。
要先用180萬諮詢
經濟唔好，政府仲花埋啲資源去檢討所謂香港品牌。領導檢討工作嘅鬍鬚曾噚日宣佈設立myhk2020.com網站，又搞繪畫比賽，收集公眾對香港2020願景嘅意見，希望替品牌注入新動力喎。香港品牌推出已經有七年，相信好多港人對呢個計劃都一知半解，最廣為人知嘅睇怕都係嗰個經常被譏為唔似雞、又唔似鳳嘅飛龍標誌。
呢個標誌當年由時任政務司司長曾蔭權負責策劃，使咗成1,000萬公帑嚟設計；今次檢討會睇埋飛龍標誌保留與否，但要先花180萬嚟諮詢檢討；如果檢討完話要換過個嘜頭，唔知又要使幾多錢去搵顧問公司搞呢？