公民黨張超雄落選新界西直選之後，現任立法會議員嘅身份，仲有十幾日就屆滿。不過，佢同八方講，佢嘅議員辦事處會維持部份工作，為市民提供協助。
早排颱風吹襲，大澳水浸得好犀利，呢位社工界長毛實地了解完災情同居民需要後，就好勞氣，「今次政府反應遲鈍，冇睇到居民嘅基本需要，衞生環境差，政府又唔理；民政事務署派人嚟登記咗災民啲名就算，又冇跟進，更加冇人幫老人家搬嘢抹嘢。」
張超雄係理工大學應用社會科學系全職講師，做議員時大學嘅工作量少啲，好似兼職講師咁，佢笑住咁話落選咗就做番全職講師嘅工作量。至於喺公民黨嘅參與，佢話會一如既往咁積極喎。