【本報訊】奧運馬術賽早已結束，警方披露曾於奧馬前後展開「木馬屠城」計劃，派員喬裝混入場內，測試安檢，結果曾成功瞞騙馬術公司保安員，警方事後立刻提醒保安公司要加倍小心。
持假證瞞過保安員
2008年奧運及殘奧會策劃組高級警司陳健雄接受訪問時表示，警方當時派出人員喬裝不同人物，於比賽前後使用不同方法混入場內，測試場地安檢，「例如用假許可證、捐圍欄、偷拍等，睇吓有冇漏洞，結果都被成功截獲」。但惟獨一次「木馬屠城」成功，「嗰次同事用假證揸車入去，成功瞞過保安員，我哋立刻叫保安公司要小心啲，提高警覺性」。
陳健雄指出，奧馬場地接近民居，如沙田場地鄰近馬會職員宿舍及城門河，管制範圍受限制，「唔似北京等，場地遠離民居，有足夠管制區」。另一挑戰是酷熱天氣，警方除為人員提供雨傘及樽裝水，並加派人手替更，縮短每更工時，又事前向人員進行「輔導」，「教佢哋如何諒解同點樣溝通，等佢哋有晒心理準備」。他相信今次經驗有助警方籌備明年東亞運動會。
對於曾有示威者成功偷運雪山獅子旗入場展示，陳表示警方首要重點是防止武器或爆炸品等危險品帶入場內，「警方唔可能懷疑你身上藏有雪山獅子旗就要求搜身，雖然咁做係唔犯法，但呢啲嘢由保安公司負責」。