大後日（2號）舉行婚禮嘅陳慧琳（Kelly），噚日以表演嘉賓身份出席沙田馬場建場30周年紀念活動，同場仲有單車手黃金寶同騎師韋達，鄭丹瑞同朱凱婷就擔任司儀。
High到跳舞
噚日Kelly嘅爸爸都有出現，佢話自己係標準馬迷，所以逢有賽事都會入場，咁啱今次囡囡喺開賽前表演，咪特登提早入場支持。被問到有傳Kelly收1,000萬禮金，陳爸爸笑笑口咁話：「幾多唔緊要，總之滿意啦，對女婿（劉建浩）都好滿意，佢追咗我個女12年，等咗咁耐，唔係咁簡單㗎！我畀佢100分。」其後Kelly出場演唱，陳爸爸high到企起身跳舞，表現非常投入。
鑽飾做嫁妝
對於陳爸爸畀足100分未來夫婿，Kelly好開心咁話：「不嬲爹哋都好鍾意佢，爹哋仲為我做咗套鑽石手鏈、戒指同襟針做嫁妝。」Kelly又話佢爸爸係馬迷，所以噚日提供自己嘅結婚日子10月2日畀佢買馬，分別係2場10號同10場2號，可惜兩隻馬都三甲不入，帶挈唔到爹哋贏錢。
Kelly嘅婚期逼近，但佢未有緊張感覺，佢仲話：「個婚禮係我經理人鍾珍負責晒，唔使煩，噚日我先至試完婚紗，奚仲文整得好靚，件婚紗會係一字膊，露出個膊頭，都幾性感㗎！」
