近日娛樂圈接連傳出兩宗喜訊，先是40歲的劉美娟和35歲的張崇德在日前順利誕下重近9磅的B女，二人三年抱兩，可喜可賀，因受毒奶粉事件影響，劉美娟為了B女健康着想，實行以人奶加日本進口奶粉餵BB；另一對幸福父母則是現年47歲的吳鎮宇與太太王麗萍，前日一索得男，誕下一名重近8磅的可愛B仔。
-張崇德：陪瞓咗4日-
劉美娟與張崇德三年抱兩，於上周二（23日）誕下二人的第三個愛情結晶品，可愛B女十分重磅，再為人父的張崇德透過電話接受訪問時興奮地說：「BB女重8磅15安士，都接近9磅，BB女好健康，太太剖腹生嘅，我唔單止入產房，仲喺醫院陪瞓咗4日，我哋喺上周六已經出咗院，母女平安真係好開心。」
食日本進口奶粉
張崇德續說：「今次湊成個好字，之前失去過一個，之後得番個仔，已經好滿足，後來覺得應該為個仔搵多個伴，𠵱家已經達到目的。」張崇德這個廿四孝老竇兼老公，也有幫手為囝囝及囡囡洗澡，他自問是熟手技工。他又表示為了多陪家人，現在盡量抽空照顧仔女，目前他正修讀神學碩士，今年便畢業。
懷孕期間胖了40磅的媽咪劉美娟，對於毒奶粉十分小心，現在以人奶加奶粉餵B女，她說：「我哋係買直接日本進口嘅奶粉，呢啲冇得驚咁多，梗係人奶好啲，不過都要視乎身體係咪可以應付到，醫生話我嘅傷口復原得好快，𠵱家我都唔痛，其實可以減少食止痛藥。」
丈夫拍分娩過程
劉美娟提到丈夫張崇德陪同進入產房，更透露他當日把部份分娩過程拍攝下來。講到可愛肥B女，劉美娟笑說：「我唔知個BB似邊個，因為佢出世只有幾日，個樣都仲未定晒，不過佢算幾易湊，好少喊，只係每隔4個鐘肚仔餓先會喊，食飽飽又再瞓過。」
採訪：陳寶明
娛樂資料庫：長子夭折控告醫院
剛誕下一女的劉美娟現年40歲，與現年35歲的張崇德於01年共諧連理，05年2月在聖德肋撒醫院為丈夫誕下逾7磅重的長子天藍，惜出世一天便夭折，經解剖後證實因頭部出血致死。兩夫婦決定再生，去年初誕下8磅多的兒子日希，他們向記者形容日希猶如天使，帶給他們歡樂。此外，劉美娟今年2月入稟高等法院，控告醫院、婦產科醫生及兒科醫生疏忽，導致其長子死亡，要求賠償。
-吳鎮宇無緣入產房-
現年47歲吳鎮宇與36歲新加坡女藝人王麗萍於02年結婚，至今年初其妻夢熊有兆，原本預產期是下月初，豈料小寶貝提早於前日來臨，令鎮宇措手不及，因為王麗萍在家作動時，鎮宇正身在內地工作，獲知喜訊後即時趕返港。
提前作動剖腹產子
前日王麗萍在家感不適，因老公不在身邊，只好由鎮宇母親及好友張達明送往養和醫院，醫生經檢查後認為胎兒要提前出世，終決定剖腹產子，誕下約8磅重的男嬰，鎮宇前日傍晚返港後即趕往醫院陪伴太太，並陸續向好友發出喜訊。吳鎮宇昨日說：「太太一索得男真係好開心，不過我冇陪太太入產房，因為我喺北京工作緊，噚日專程趕返嚟。」他又表示妻兒平安，多謝大家關心。
鎮宇雖然仍未想好囝囝的中文名，但英文名已決定為Sigmund，德國第一個太空人就是叫做SigmundJahn，而鎮宇兒子出世當日，剛巧是中國太空人回歸地球之時，故鎮宇想到以Sigmund這個太空人名字為孩子命名。
據鎮宇向好友形容，兒子手長腳長，樣貌像父母，十分可愛，他十分感謝太太誕下這個小可愛，所以這幾天會留港陪伴太太。不過一班好友劉青雲、黃秋生、張家輝及黃子華等均戥他高興，昨晚特別相約鎮宇飲酒慶祝。
張達明陪產做契爺
記者昨日致電張達明時，他說：「噚日鎮宇老婆作動，打畀我老婆，我同太太、鎮宇媽咪陪佢入院，因為鎮宇喺北京，噚日雖然都趕到返嚟，但BB出世一刻佢就睇唔到，不過佢不斷發短訊問情況，一直好緊張同擔心，後來話畀佢聽母子平安，個B好靚仔，好得意，佢趕到返嚟見到個仔真係好開心。鎮宇媽咪抱個孫時，一樣係好興奮。係我睇住個B出世，梗係要同鎮宇講，要做個B嘅契爺。」
採訪：葉雪
娛樂資料庫：結婚6年終償心願
前日為丈夫吳鎮宇誕下兒子的新加坡籍女藝人王麗萍（圖），於98年在香港一的士高內邂逅吳鎮宇，二人於02年在泰國的六星級素可泰酒店舉行婚禮，鎮宇的好友黃子華、劉青雲和張達明等均有到賀，該酒店連木村拓哉和李察基爾等知名影星都曾入住，可謂來頭不小。
現年47歲的鎮宇一直渴望做爸爸，加上有感36歲的妻子也算是高齡產婦，故得悉愛妻懷孕後表現得十分緊張，更曾表示會停工一年陪太太待產外，又經常親自煲靚湯給她補身，名副其實廿四孝老公。
相士話：張家女兒旺父親 吳家長子桃花盛
娛樂圈喜訊頻傳，張崇德和吳鎮宇先後迎接了一個新生命，記者昨日致電堪輿學家區仲德，了解兩位小孩子的命格，他說：「張崇德嘅女命格屬陽火，係天生完美者，容易有優越感，唱歌方面比較叻。佢命中財旺，係旺父嘅命格，加上有粒天乙貴人星，一生都會有長輩相助，另外有一粒紅艷星，比較受觀眾歡迎。佢身體好健康，但比較難教。」
區仲德又說：「吳鎮宇嘅囝囝命格屬陰金，命旺，係一個享樂者，個人重感情，加上命中有兩粒桃花星，女性緣比較旺。讀書成績就一般，會比較早出身，好有可能投身演藝事業。」
採訪：李全