【本報訊】得半場好波！衞冕的南華昨午在大球場上演的甲組聯賽，上半場表現可人，下半場判若兩隊，最後僅以2:0小勝謝菲聯，全取3分後升上第4；賽後有入場球迷在討論區指，南華下半場表現悶得令他瞓着。
挾大炒屯門普高餘威，南華昨在1,728名球迷面前，派出之前獲高度讚揚的小將歐陽耀冲任正選；開賽7分鐘，南華便由陳肇麒的世界波先開紀錄，之後史高斯在25分鐘入波，中場組織亦出奇地流暢。
豈料易邊後南華大跌watt，錯誤多且攻勢少，「悶暈」在場球迷；難怪完場後，球迷對南華贏波仍是噓聲多於掌聲。球迷Thomas在南華部落留言：「下半場開波無耐就瞓着咗，瞓到廸天奴後備入場都唔知，到85分鐘，我決定離場。」南華教練廖俊輝賽後表示，上半場表現不差，但尾段盡遣4前鋒落場，削弱中場組織力。
天水圍飛馬2:3公民
另外，天水圍飛馬在頭場以2:3不敵公民，兩連敗之餘，還有科夫及奧利華拉領紅牌；兩人將錯過下周日在元朗對南華的「兄弟兵」大戰。
