立法會下星期三復會，班新丁雖然仲未正式宣誓做議員，但已經磨拳擦掌，其中八位噚日更搶先喺港台一個節目上先嚟個唇槍舌劍，一向火爆嘅毓民就揀咗鼠王芬做目標，起勢開火，鼠王芬唔知係咪未睇過一段叫「民建聯最無恥」嘅短片，竟然同毓民聲叠聲鬥大聲，結果當然係悲劇收場，搞到話唔想再講嘢。
毓民叫鼠王芬求佢
呢班立會新丁都算笑料百出，一開頭主持就諗住撮合近排盛傳唔妥對方嘅社民連同公民黨講和，安排社民連主席毓民同公民黨新人王陳淑莊握手言和，點知毓民只係先禮後兵，握完手已經話：「如果個世界咁簡單就好。」現場觀眾預咗有戲睇，一去到辯論「立法議員是否應該規限只連任一屆？」嘅環節，反方代表毓民果然先向公民黨開火，但佢鬥咗幾句，觀眾就發現同陳淑莊同屬正方代表的鼠王芬膽識過人，多次喺辯論期間向毓民還拖。
毓民話好反對限死議員只能連任一屆，話香港立法會同外國啲總統同政府唔同，立法會根本係跛嘅，冇執政權只有質詢權，仲話「所以一定要選毓民做一世議員！」話口未完，鼠王芬就即時寸佢，話唔可以個個議員都話要做一世，「唔可以個個都有自戀狂！」。搞到毓民忍唔住還擊，話鼠王芬喺選舉論壇對住佢冇嘢講，唔知點解噚日咁多嘢講。鼠王芬亦唔係善男信女，不甘示弱咁繼續同毓民聲叠聲鬥講。
一向聲大大嘅毓民，最終以音量力壓鼠王芬，話如果鼠王芬求吓佢，佢就可以畀鼠王芬講嘢，鼠王芬經過一輪激戰，唔知係咪因為冇晒氣，只好話：「我唔講嘞，因為我唔想求佢」。噚日坐正喺毓民同鼠王芬之間嘅法律超人謝偉俊，喺兩人鬧完之後，就忍唔住話：「我左右耳啲耳水好似有啲唔平衡。」搞到現場觀眾笑到反肚。
過去主持開會議嘅前立法局主席黃宏發，就話噚日嘅辯論規則同立法會議事規則差好遠，立法會根本唔會容許議員發言時好似毓民同鼠王芬咁聲叠聲，話驚呢班新丁經過噚日咁嘅辯論，學壞手勢日後入到議事廳繼續聲叠聲鬥大聲，發叔仲擔心到時「分分鐘大打出手都唔奇」喎。
mailto:[email protected]