新加坡全新的濱海灣賽道，唔知有幾多人試過走一圈呢？小記噚日有幸坐傳媒巴士，感受一下這條長約5公里嘅F1賽道。
坐傳媒巴士當然冇賽車嘅速度感，不過勝在可以睇清楚賽道四周圍嘅風景；幸福摩天輪、魚尾獅、濱海灣海景及博物館等盡收眼底，簡單講句，就好似參加新加坡半天團一樣。
景靚，賽道亦值得一讚，路面平、又夠寬闊、彎位安全措施十足，好似樣樣都有讚冇彈。不過，有車手就同小記「詐型」，話新加坡賽道彎位死板，永遠都係一左一右咁轉，難聽啲講就好似喺「歡X天地」玩碰碰車咁，冇乜難度。
除咗難度方面有少少扣分之外，其實觀眾席亦有不足處，部份觀眾席嘅區域仍然係一片泥濘；情況就好似新屋裝修趕入伙咁，啲座位表面更加鋪滿沙塵，小記就試過不小心跌一跤，尾龍骨痛到入心入肺。