王喜被標籤為麻煩友，鄭嘉穎引人入勝的則是是非緋聞。當麻煩友遇上是非精合演新劇《烈火雄心Ⅲ》，每次拍劇例犯鬧不和、改劇本、扮導演三宗罪的王喜，自嘲又冇後台、冇運行，故深明今次拍劇，麻煩源頭會再度出現，為自保飛離九丈遠，彼此保持安全距離。
「話我哋係好兄弟，會唔會好虛偽呢？我真係做唔出。」王喜寧願被責犯賤，聲言反正拍劇12年換來六字真言：擺上枱，拖落水。如今對鄭嘉穎只好自私一點，sorry了，因為王喜要求八個字：獨善其身，安然度過。 撰文：朱倬誼
王喜是個勤力演員，不過早年已被指為麻煩友，拍劇屢犯三宗罪：與人鬧不和、改劇本、扮導演，近日跟鄭嘉穎拍攝《烈火雄心Ⅲ》是非持續，再犯三宗罪，傳二人爭戲及交惡。嘉穎情況更惡劣，曾為禁煙大使的他被拍下抽煙照，傳他自費請替身拍戲，爆粗鬧導演，與周麗淇和佘詩曼的三角戀又糾纏不清，是非沒完沒了。
七年未有聯絡
兩個是非男人合作拍劇，互有牽連，問王喜覺得嘉穎如何？王喜日前接受訪問時劈頭便說：「佢幾好EQ，有關佢嘅報道出嚟之後，佢冇影響工作亦冇情緒跌宕，但大部份媒體都對佢興趣濃厚，於是用我做佐證。譬如，我好辛勤做緊嘢又或者表現專業嘅時候，就攞呢方面去描述佢另一個層面，咁我覺得死啦，如果呢個手法繼續落去，就等如麻煩找上門，往後又真係發生咗。」
王喜和嘉穎01年時曾在《烈火Ⅱ》飾演親兄弟，此後七年沒聯絡，今年才於《烈Ⅲ》演消防同袍。七年人事幾番新，王喜形容嘉穎差距很大，他說：「嗰時佢好少表達自己意見，事隔七年，大家有進步有成長，佢喺工作上有好多唔同意見，但都係想件事好。對我嚟講，佢係一個陌生人，01年見過到08年再合作，一開工嘅時候，我希望用最短時間同佢培養劇中嘅兄弟情，譬如搵共同活動，我提議不如同佢夾錢請個茶水阿姐，每次拍大場面時搵阿姐招呼同事，咁佢又OK。我希望由大圍事拉近距離，或者研究邊場戲可以雕琢啲，從中聯絡感情。」
只求安然度過
不過王喜的做法沒奏效，當傳媒將他和嘉穎比較時，是非就來了，王喜苦笑說：「我又離唔開自己條命，唔使風水佬判我都識批嘅六個字：擺上枱、拖落水。由嗰時開始對唔住啦，真係冇辦法再奉陪，我太知自己喺過去十幾年嚟得到嘅對待，就係呢六個字，所以我決定同嘉穎保持一個安全距離。」
也許保持距離對大家都安全，王喜直言：「我冇諗過佢，對唔住，喺呢個層面上我好自私。我覺得靜觀其變，我唔知揸筆嘅人會點樣對待我同佢，姑勿論點寫，我唔想走咁近，因為呢個係個麻煩嘅源頭。」
想不到嘉穎的是非和緋聞突然瘋狂爆發，王喜怕，因為他易惹是非，怕跟嘉穎相處多，是非更多，王喜說：「近期雜誌同報紙都攞佢做重點，換轉我係佢都覺得壓力大，仲要喺工作上添麻煩，我更加唔想，所以將安全距離拉得更闊，橫邊嘅人咪覺得我哋係咪不和？係咪冇偈傾呀？其實唔係，起碼我單方面keep住安全距離唔想走近，其他人點睇我唔介意，我只係希望，衰啲講句，可以獨善其身，安然度過。」
扮老友太虛偽
聞名電視城的王喜三宗罪，提起源頭，王喜自嘲：「因為冇緋聞、冇後台同埋冇運行，所以得呢三個結果。」他又為罪名解說：「我係有處理劇本，我郁自己嘅對白，唔會郁人哋嗰啲，呢樣係拍《緝私群英》時歐陽震華教我嘅，話覺得劇本有唔對路，前文後理唔通，自己做演員嘅搞順番佢。改，有邊個唔改？爭在係咪改得好之嘛，我好大膽講，我改過嘅一定比冇改過嘅好。扮導演係改劇本嘅下聯，邊有得扮啫？台前幕後冇需要聽，攝影師唔會因為我扮導演roll機㗎喎！至於不和就更主觀，好似我同嘉穎真係唔熟，陌生，我01年識呢個人，事隔七年冇聯絡，我話畀你聽我哋係好兄弟、好friend㗎，會唔會好虛偽呢？我真係做唔出。」
去年王喜與林保怡拍攝《江山美人》時傳不和，王喜稱他又是不明所以：「好奇怪，我同佢拍《刑事情報科》都冇事發生，拍《江山》時大家分工做嘢，後尾出咗奇形怪狀嘅新聞，我一頭霧水，覺得點解又係好哋哋，點解無啦啦又大頭佛，去到最尾又係我唔啱？我覺得如果我真係如以前嘅報道，如洪水猛獸、咁麻煩、咁難搞嘅話，我諗TVB一早炒咗我啦。」
陳志雲帶挈西藏直擊聖火
王喜：佢老點我
無綫總經理陳志雲旗下愛將多的是，有陳鍵鋒、鄧健泓、崔建邦等等，其實陳總與王喜才長情，92年共事商台時相識，迄今16載。早前有傳王喜獲陳總欽點，去西藏直擊奧運聖火傳遞過程，但他出現高山反應昏迷又炒車落河，於是再傳陳總安排他在《烈火雄心Ⅲ》中加戲作為安撫，這天王喜卻斷然說：「佢係我朋友，我冇喺朋友身上攞着數。」
「俾豬頭骨啃死」
王喜續說：「我同陳生分得好清楚，喺私人相處上唔會提公事，我喺公事上唔會冇厘啦謂撻陳總出嚟，陳總亦唔會將本來唔係我嘅嘢畀咗我。最近一次我去西藏，成日話被欽點，你睇番呢件事嘅結果係乜？佢唔係欽點我，係老點我！去到咁，你去吖！又冇時間適應，一入西藏唔夠72小時就由零海拔衝上5,200米，根本就攞條命嚟較飛，去到最尾出埋事，仲要禍不單行，送院途中衝埋落河。豬頭骨我啃，啃到幾乎死，仲話我被欽點？話為咗彌補我西藏嘅遭遇喺《烈火》加戲？我加乜嘢戲呀？
「30集入面我得20集戲咋喎！呢個事實證明陳總係咪加我戲，我話畀你知，陳總冇！我亦都唔會接受。如果陳總真係做咗，我會拒絕，甚至同佢理論，你千祈唔好搞我，因為我同佢係朋友，唔想涉及任何工作，大家要識避忌。」
近年當ABC藝員都爭做陳總或藝員部高層樂易玲的愛將時，曾傳獲陳總撐腰的王喜本應佔優，大可打友誼牌，跟其他藝員爭機會，王喜則說：「我唔可以瓜田李下，唔想玷污我應該得到嘅掌聲。如果因為咁嘅小動作得到掌聲，我寧願唔要，你話我犯賤都好，我唔係高產量演員，簡單嚟講唔係力捧演員，一年一部，但每一次我都係拚咗命去處理我嘅劇本或者改劇本，拚咗命去演，先得呢啲掌聲，那怕係一年一次，我可以抬起頭得到大家嘅掌聲，唔靠使橫手或者任何人欽點，我喺呢方面好清高㗎。」
「瞓低梗係最好」
有說當下無綫時興埋堆傍高層博取機會，王喜直言任何公司都有埋堆文化：「呢個係投資，亦係賭博，有冇回報就要睇你投資準唔準，押注啱唔啱時間，同埋攞幾多本錢出嚟押，瞓低梗係最好啦。」
樂易玲喜與小生花旦聚會聯誼，王喜為何不參加？他笑道：「我連陳志雲都唔聯誼，我點會搵樂易玲去聯誼呢？我返工就返工，TVB畀唔到好可觀嘅錢我，但畀到發揮同創作嘅空間我，我遇上好多好導演同好演員，大家好同心合力將本來平平無奇嘅戲變得更加有趣，呢啲嘢唔可以單靠劇本，所以我重申一次點解要改劇本？改係需要氣力、時間，先可以改得出比原本更好，如果我改到比原本渣嘅話，導演都band咗我啦，我點解唔留時間瞓覺打機？點解放精力喺劇本裏面？因為我尊重呢份職業，尊重我份糧同公司，人爭一口氣之嘛，就算我係掃街，都希望掃到條街亁亁淨淨啦。」
