東亞銀行竟遭擠提，實在令人覺得意外。擠提源於一啲神秘短訊，不知來自邊度，傳開之後，變成謠言病毒，一發不可收拾。有老友講，假使不法之徒走上深圳買一張電話卡，越境傳短訊到香港，係好難追查嘅，警方動用超級電腦去追，亦花時間。科技呢回事，左丁山唔識，只知道世界上任何一個地方，都極度重視一切有關銀行不穩、破產之傳言、謠言，必定嚴查，防止有罪惡分子、恐怖分子擾亂金融，如今美國就出動FBI去查雷曼破產前嘅市場活動與謠言啦。
中國戰前戰後都有擾亂金融罪，刑罰相當嚴重，故此即使在新聞自由嘅香港，傳媒對處理有關銀行嘅傳言、謠言方面，不敢怠慢，嚴肅處理，唔似得玩娛樂版名人咁輕鬆隨便。香港並非冇銀行擠提歷史，十九世紀已經有之，二十世紀一九六五年嗰次最嚴重。明德銀號、廣東信託先後遭擠提而破產，最後殃及恒生、廣安、道亨、永隆。六五年二月八日中區交通嚴重堵塞，警察疲於奔命，情況失控，滙豐與港英政府連續發表聲明亦無效，擠提恒生嘅人龍從恒生總行排到香港會會所。二月九日上午，港府頒佈緊急法令，宣佈英鎊為法定貨幣。長話短說，到咗四月八日，恒生董事局忍痛出售控股權，以五千一百萬港幣售出51%股權，滙豐自此控制恒生。二○○八年九月二十五日，恒生市值二千七百九十七億元，滙豐持有六成幾股份。
一九六五年經歷一場如此驚心動魄擠提，經濟衰退，一九六六年天星小輪加價斗零，釀成暴動，一九六七年發生左派大暴動，可以講話，擠提之後香港衰足三年，大量工人失業，股市樓市齊齊大跌。你估散播謠言擠提銀行係好玩嘅惡作劇乎？死得人㗎！無論有甚麼私人恩怨，切勿因此而散播謠言，向銀行報復，最終會害埋自己，至於故意散播謠言而一早沽空意圖獲利者，實際上係賺取不義之財，因住收尾幾年。
（一九六五年擠提資料引自馮邦彥著《香港金融業百年》，三聯書店2002年版）。