憑電影《波叔出城》（Borat）奪得金球獎影帝的英國諧星沙格畢朗高漢（SachaBaronCohen），最近化身成同志時裝記者，拍攝惡搞新片《Bruno》。日前他到米蘭時裝周搞亂檔，硬闖一個天橋騷而被警方拘捕蒙頭押返警局。未有被控的波叔，轉頭即大模廝樣在另一個騷上風騷現身，繼續玩嘢。
現年36歲的「波叔」沙格畢朗高漢，憑劇集《DaAliGShow》而成名，劇中他扮演三個角色，包括HipHop主持人AliG、哈薩克記者波叔，以及奧地利同志時裝記者Bruno。前兩個角色過往已分別被搬上銀幕拍成《阿里出城：玩到入國會》（AliGIndahouse）及《波叔出城》，《波》片更令沙格成為金球影帝。
設計師面黑黑
最近波叔將Bruno的角色拍成電影《Bruno》，再度發揮其大整蠱伎倆。今年6月劇組在阿肯色州蒙騙1,500人做臨記，幾乎引發暴動。他又試過突擊追訪加州州長阿諾舒華辛力加（ArnoldSchwarzenegger），引來阿諾不悅。
近日波叔到米蘭時裝周搗亂，日前他利用偽造通行證，混入名牌Iceberg天橋騷的更衣室，嚇到在場模特兒雞飛狗走，驚動保安人員。前日他又再出動，硬闖AgathaRuizDeLaPrada的天橋騷，今次波叔更以一身騎呢打扮衝上天橋扮模特兒，保安見狀即捉住他，有觀眾受驚尖叫，但也有人大叫歡呼。之後工作人員惟有關燈叫停，讓演出從頭開始，但設計師Agatha顯得面黑黑。
警方到場後將波叔蒙頭押返警局，沒有任何身份證明文件的他仍未知驚，還向警員搞笑道︰「我可否像電視劇的疑犯般先打個電話？」警方了解事件後，未有控告他，並將他即時釋放。
風騷地滿場飛
事發後米蘭時裝周各場時裝騷均加強保安，以免波叔再惡搞，但神通廣大的他同日又成功於另一場騷上大模廝樣現身，還風騷地滿場飛。
其實波叔上次拍《波》片已搞出不少事故，包括遭哈薩克政府抗議、走去華府請願，影片上映後多位被玩的受訪者紛紛告上法庭，看來今次他拍攝《Bruno》，同樣有大把手尾跟。