轆Book：飛躍凌羊

我叫阿咩，人稱楊小姐，起居飲食乜都要夾過度過，買屋要夾生肖、搵對象要夾八字，連食藥都最緊要夾！港人偏愛追求「S班」同「7仔」，真正識得享受之人，自會明白大凌LS460L過人之處；4,608c.c.V8偈，仲有全球首創8個波，沉穩中難掩飛躍幹勁，簡直天生係以守為攻嘅山羊座特性。

記者：徐影龍
攝影：陳陶鈞
Model：Phoebe@StageModels

沉默的羔羊

LS460L就係LS460長陣版嘅意思，車櫳更寬敞更開揚，以山羊座認真生活、追求地位嘅性格嚟睇，車內應有盡有嘅豪華設備就最得我歡心，除咗行車時超級寧靜外，特長車櫳配合4大張柔軟舒服嘅真皮座椅，前後排一樣坐得好冧。拉低座椅輕躺其上，天窗一開，陽光從頭上照射落嚟，瞇埋眼享受呢股悠閒感，就如置身一大片青草地上，食飽草想瞓覺一樣咁舒服。
當然，好難忍得住唔嘆埋個氣壓式按摩椅，升起Ottoman電動腳靠，成隻大班羊咁攤喺度，覺悶咪播番套《沉默的羔羊》刺激吓囉，頭頂9"大芒瞓喺度睇啱啱好，加埋MarkLevinson音響連19個環迴喇叭，勁有氣氛，天時暑熱包降溫。若嚇到心寒嘅話，紅外線偵測器更識得自行改變冷氣溫度，仲可4個位獨立調校，唔怕影響其他乘客。豪華裝備全電動，㩒下個掣乜都校到，撻車唔使用車匙，連拉手掣都係電子式，毋須擔心粗手粗腳整親我啲羊蹄。

■引入L-finesse設計概念，令車首更高貴大方。

■頭燈微微上揚，相當之神氣。

■雙出式尾喉令動力輸出更暢順，只嫌隱藏喺泵把內，太過低調。

■特大天窗令車內更開揚，又係電子式一按開關，隨時親親大自然。

■前排超闊落，高大保鑣及司機毋須擔心會頂住後邊老細對腳。

■全車前後連四邊角都有障礙物Sensor，加埋後泊鏡頭，大車泊位一樣舞得掂。

羊毛，不一定出自羊身上

我經常被人點錯相話係羚羊，查實山羊對角係唔同㗎！大凌亦一樣被人誤解，外形繼承L-finesse概念，車頭箭形輪廓相當之高貴大方，頭尾燈啓動時呈L形，食番晒Lexus個廠徽，值得一讚。睇LS460L個樣斯斯文文老闆格局，車又牛龜咁大架，以為佢慢吞吞無火氣。你錯喇！4,608c.c.排氣量擔得起架車有突，加埋V8偈成381匹馬力輸出，我揸咁耐都未試過盡油爆住去，要用盡其全球首創嘅8前速波箱，已經好高難度，更遑論要拖低波谷轉數，誇啲講句，掂住油門已可走勻港九新界，呢啲咪力嘅表現囉。
俗語有云：羊毛出自羊身上，有咁大Power，油錢當然同樣可觀喇！你又錯喇，官方數字係9.0公升油/100km，大概$1.5一公里，我就揸得粗魯啲，鍾意大腳起圍快感，所以要差唔多$2一公里，雖然耗油量對比同廠混能型號有啲距離，不過以咁大Size同四千幾c.c.車嚟講，算係幾慳油㗎喇。而且揸得大凌，都係慣性滋油淡定，好Smooth好柔順嘅行車方式，食油極有限。

■開埋Ottoman電動腳靠，托起雙腳，皇帝般嘅享受。

■氣壓式按摩椅唔會嘈嘈閉，小山羊舒服到徐徐入睡。

■後排中間可抽出茶几仔，兩邊頭頂都有鏡仔連射燈。

■前排座椅校得勁低，軟綿綿成張床咁，羊見羊愛。

LexusLS460L
售價：$1,344,000

引擎：4,608c.c.V8DOHC
馬力：381ps/6,400rpm
扭力：493Nm/4,100rpm
傳動：8前速半自動波，後驅
查詢：皇冠汽車（25119430）