從前嘅音響雜誌刊登碟評，比現在開放得多，只要係碟評人之心頭好，即使無廣告也可全文照登。所以我今後會在本欄多推介一些音響雜誌唔理嘅靚錄音。今次介紹一張真正Fever嘅結他錄音畀大家。
大師返來囉！
結他大師EarlKlugh出道30多年，推出過數十張叫好叫座嘅錄音，幾乎每年也有新作面世，部份專輯的音效更被發燒界公認達到天碟級數，但自99年其母親Elizabeth過世後，Earl便沉寂了好一段時間，9年來只曾推出過一張純結他錄音，聽罷他這張推出不久的《TheSpiceOfLife》，忍唔住隔空向大師講句：「你返來咯！」新作中Earl找來一大班樂壇高手兼老友記助陣，再加一組管弦樂團伴奏，13首作品中9首由他自己創作，風格包含Pop、Jazz、Soul等元素，簡單講係一張令你聽得舒服到邊度都唔想去嘅輕結他靚錄音。
陳年木結他
點解有咁多發燒友追捧EarlKlugh作品？只因旋律好聽易入耳之餘，每張碟的音效也夠晒超班，本碟當然唔例外，每件樂器嘅音色與質感俱佳，尤其係那支陪咗Earl幾十年、由ManuelVelazquez特製嘅陳年木結他，經膽咪錄出來嘅音色，靚到猶如陳年佳釀般芳香醇厚，越聽越有味。
李廸偉
http://hk.myblog.yahoo.com/reviewcd