新加坡F1搞得唔錯，聽講現任旅遊發展局主席田北俊，亦有到場感受大賽車氣氛，唔知我哋會唔會偷師，將來喺香港又搞番個F1大賽呢？
今次係筆者首次採訪F1，個人最欣賞嘅，就係賽會提供小型無線電視供車迷租用。賽車場咁大，又唔係到處都有大銀幕，呢個手提電視，就最啱現場觀眾喇，等大家唔會錯過任何精采鏡頭。
帝王式採訪夠爽
不過要租呢部手提電視，最平一日要50歐元，一次過租3日就平啲，但係都要75歐元，即係為起港紙900蚊，抵唔抵就見仁見智喇。
今次有幸到新加坡採訪F1，都係要多得保時捷邀請，聽講小記住嘅酒店，一晚要5,000蚊港紙㗎，最誇張係酒店安排專人接機，過境時唔使排隊，因為行貴賓通道，嗰個好nice嘅新加坡小姐，仲幫我填埋入境表㖭，跟住就有一部平治E220係門口等你，真係令小記有啲受寵若驚嘅感覺！