老友投資Ｌ自三藩市來電，問左丁山有冇俾金融海嘯浸死，左丁山賺唔到錢啫，唔會輸死嘅，本欄讀者都知道左丁山兩個幾月來都係唱淡嘅啦。老友Ｌ就呻，佢十幾二十年前在ShearsonLehman（兩間公司後來拆夥，Shearson併入咗花旗）打工，積下一筆唔算數目大嘅退休金，離開後仍然有一個固定收入，因為雷曼管理退休基金嘅成績十分好，幾乎令佢後悔點解當年要離開雷曼。好呀好呀，晴天霹靂，雷曼一Ｑ清袋，退休金冇晒，好彩唔係好多錢啫，於是投資Ｌ又慶幸自己老早離開咗，否則積蓄埋一份優厚退休金唔見晒，會喊幾日幾夜。
投資Ｌ一位朋友在AIG服務三十餘年，儲埋唔少AIG股票，股票來源有三：（一）公司畀嘅認股權、（二）公司每年准職員買100股，保本不賠，（三）喺公司做得好耐，有感情，認為自己公司咁賺錢，有信心，於是年年買啲。誰不知AIG股價急跌，跌到兩蚊（美元）先至反彈，蝕到死啦，幾個月前仲係四五十蚊一股呀，呢位朋友為之儍晒，投資Ｌ唔見咗一啲雷曼退休金，唔開心幾日，但見到朋友表情如喪家之犬，更加戥佢心痛。
AIG其實對僱員好好，財務Ｍ以前在AIG打工，每年年初可根據每股市價買入100股AIG，到咗年尾如果股價上升，就繼續持有，如果股價跌低過買入價，可以以成本價將呢一百股賣番畀公司，唔使蝕，但以一年為期，公司只會一年買入一次一百股。過往AIG股價不斷慢慢上升，公司毋須購回，於是財務Ｍ積積埋埋都有千零股，點知突然間就唔見咗幾萬美元，難得佢飲茶時仲笑得出。財務Ｍ話佢知道一啲來自上海嘅老資格投資者好鍾意AIG（因該公司發源於上海），見到股價跌破四十美元時，認為好低好抵買，踴躍買入，呢勻真係輸到仆直，惟有希望前主席Greenberg努力救亡成功，免AIG入咗UncleSam口袋，原有股東唔使輸得咁慘。唉，聽呢啲故事，就覺得世事難料，AIG與雷曼都係老字號，大名牌，一年前，邊個夠膽話AIG與雷曼唔掂？講出都俾人笑啦！