噚日好多行緊街嘅市民都睇住大電視直播神七太空人嘅任務。嚟香港參加活動嘅國務院港澳辦前副主任、全國政協常委陳佐洱話，睇住電視畫面又興奮又自豪。港區政協陳永棋形容更加大讚神七太空人表現「好勁」，相信本港會有團體好似03年邀請楊利偉訪港一樣，邀請神七太空人訪港。
由一班港區政協組成的港區省政協委員聯誼會，噚日搞咗個理事會就職典禮。唔講唔知，呢個會有將近2,500萬營運資金擺咗喺東亞銀行，早幾日東亞受謠言影響出現擠提人龍，會長戴德豐話，對東亞好有信心，冇諗過要拎走啲錢喎。
戴德豐迴避毒蛋糕
由於戴德豐身兼四洲集團主席，難免被追問佢旗下嘅蛋糕被驗含有三聚氰胺嘅問題，戴德豐即時耍手兼快閃，唔肯評論。
其實呢個聯誼會同中聯辦、中央統戰部都關係密切，噚日公佈過去一年工作紀錄時，都不忘話過去幫手送咗唔少愛國愛港人士入今屆立法會，當中包括陳茂波、譚偉豪、劉秀成，同埋梁美芬喎。