黃色、綠色仲有粉紅色嘅花塔餅，以前好多人都會畀啲細路仔當糖食，用嚟杜蟲，𠵱家雖然唔流行，但市面仍然有得賣。醫生話如果真係畀小朋友食，千祈唔好當糖食，因為有杜蟲藥成份，最長只可以食三日。
最多只可食三日
好似花占餅咁嘅花塔餅，顏色靚，一啲都唔似藥，以前香港衞生環境冇咁好，好多細路仔都生蟲，父母就買畀仔女食用嚟杜蟲。醫神就住花塔餅呢一代經典，問過寄生蟲專家、香港大學微生物學系助理教授黃世賢，佢話杜蟲用嘅花塔餅，有一種叫做「哌嗪」（Piperazine）嘅成份，喺樽上面有註明，如果冇寫，就可能係「冇料」嘅花塔餅。
呢隻成份當然有杜蟲作用，喺衞生署都有註冊，可以醫線蟲，包括迴蟲同蟯蟲兩種。黃世賢話，呢種成份主要係搞到條蟲啲肌肉癱瘓，咁條蟲就可以跟住條腸嘅蠕動，排出體外，達到杜蟲功效，食兩至三日九成都可以成功杜蟲，但係肝、腎有病嘅細路唔食得，「千祈要睇住份量食，唔好當糖咁食」。
不過𠵱家較少人用呢種成份嚟杜蟲，因為其他杜蟲藥可以一劑過就搞掂，唔使食三日。黃世賢話𠵱家好少見人生迴蟲，但仲有人生蟯蟲，細路手仔唔亁淨，食嘢時好易食埋蟲卵落肚，喺體內孵化之後形成約一厘米長、頭髮絲咁幼嘅成蟲，特別鍾意喺夜晚爬到肛門產卵，搞到啲細路成日𢱑屁股，家長就應該帶佢哋去睇醫生。佢仲話，細路生得奀瘦，唔等於生蟲，唔好亂咁畀杜蟲藥佢哋食。
blog主：醫神