近嚟幫公仔箱主持飲食節目嘅「阿刀」，好鍾意指生晒，份人好難相處。講到整嘢食，佢其實都係半途出家，不過佢就口口聲聲sell自己識飲識食，扮晒食家咁款。
煮餸似懂非懂
關仁有個朋友就試過借間餐廳畀阿刀介紹同埋拍佢煮嘢食。話說嗰次阿刀去到人哋間餐廳立即擺晒款，對人好唔客氣，仲狂點人哋餐廳啲夥計幫佢準備定啲食材。
到正式埋位拍嘢嘅時候，大家先至知一向聲大夾惡嘅阿刀原來乜都唔識，佢唔單止煮嘢唔係幾掂，就連好簡單嘅程序，阿刀都似懂非懂咁，令人覺得佢冇乜料到囉！
仲有最弊阿刀最叻嗰樣嘢，係自己唔做，淨係識得大大聲點人幫佢做，仲要係唔該都冇聲，所以每次拍完嘢，同佢合作過嘅人都怕咗佢，總之就係有彈冇讚，有啲人仲四圍數臭佢㖭！
Textby關仁
