鍾意旅遊多過太空漫遊嘅小妹覺得，人類最偉大發明，並唔係乜嘢太空船飛天衣，而係旅途上指指點點永冇托手踭嘅GPS衞星導航系統。講真，冇咗GPS，翟志剛都做唔成中國航天英雄，小妹都去唔成台灣中部五天自駕遊。
台灣係一個好地方，好受香港自由行一族潮拜。問題係，除咗大城市台北、高雄之外，偏遠嘅地方由於公共交通唔發達，去親自由行都會浪費好多時間喺等車搭車。不過呢啲都係過去嘅事，自從汽車GPS普及之後，越嚟越多港人自駕遊喪玩台灣。
剛過去嘅一個禮拜，小妹同朋友一行四人旋風式席捲台灣中部。我哋首先上網喺台中市一間租車公司「格上」訂咗部福士Golf（ http://www.car-plus.com.tw），一落機即刻有位靚女接待小妹，免費接載我哋入城揀車。趕時間嘅話，仲可以叫租車公司送部車去機場。
每人每日約200蚊
小妹玩咗五日四夜，租車連油錢（柴油）大概花咗13,000蚊台幣（約港幣3,150元），即係四個人每人每日200港幣鬆啲。玩完晒，交車之後，租車公司仲會免費接載客人去機場，賓至如歸。
不過打算即將起行嘅朋友要注意，台灣颱風季節仲未完全過去，出發前記住check吓沿途道路掂唔掂，book旅店時可順便問埋，台灣人好老實，唔會唔掂講話掂。台灣唔同香港，打緊風固然慳番唔使去，打完風路面會嚴重破壞，就算馬路行得通都要小心呀。差啲唔記得講，台中機場仲可以做落地簽證㖭。
電郵：mailto:[email protected]
逢周六、周日刊出