曾患子宮頸癌的阿霞（37歲），因要照顧患有自閉症的五歲兒子瑋瑋，遇到不少困難，惟仍無怨無悔，盡顯母愛偉大。本報早前報道她欲覓得一份工時配合的工作，即獲善心僱主回應，先後有三名讀者致電本報表示考慮聘請她。阿霞最終覓得理想工作，既可賺取生活費，又可照顧兒子，生活漸上軌道。善心人士的關懷與體諒，讓她深深感受到人間溫情。
阿霞曾經小產，30出頭才得一子。當時夫婦倆手抱寶貝兒子，既幸福又滿足。然而，瑋瑋出生後數月，阿霞便證實患有子宮頸癌，未幾又發現瑋瑋患有自閉症。不幸的消息接踵而來，令她措手不及。「當時我同老公都有份工，諗住還得起，就用信用卡畀咗十幾萬蚊手術費醫癌症。點知後嚟發現瑋瑋有自閉症，要不斷做評估同治療，結果筆數越滾越大。最慘係為咗照顧瑋瑋，我根本分唔到身做嘢，全靠老公一個人搵食。」
表現獲僱主讚賞
幸而阿霞的癌病得到控制，她為分擔丈夫肩頭重擔，康復後仍堅持外出工作，希望可盡快還清債務。惟因瑋瑋無法透過言語與他人溝通，常常引發各種行為及情緒問題，需要無微不至的照料，令她在尋找工作時困難重重。「𠵱家香港嘅六歲以下特殊兒童託管服務只得半日，如果我返全職，下晝就無人照顧瑋瑋。加上佢成日要去做評估同治療，吓吓要早退，唔係個個老闆體諒。」
為了照顧兒子，阿霞承受了不少壓力。本報六月時報道阿霞的苦況，引起不少有心人關注，開設紙藝製品公司的林小姐主動聯絡本報，希望給予阿霞一個機會。阿霞不負所望，隨即獲得錄用，七月初開始擔任助手一職，表現令林小姐甚為滿意。
林小姐稱：「當時公司正需要人手，咁啱我又睇到報道，考慮到呢個職位主要做內部工作，可彈性安排工時，就諗住畀佢試吓。結果發現佢做嘢好快手，好整齊。一般公司都唔容許員工經常早退，但如果配合到時間，阿霞其實可以有好好嘅表現。」
阿霞笑言：「報道出街之後，我嘅好運就嚟啦。先有善心嘅林小姐幫忙，之後有一間私家醫院請咗我做通宵更文員，夜晚返工，朝早可以照顧瑋瑋，時間配合得啱啱好。𠵱家我主要返醫院份工，有時間就會去幫林小姐做嘢。自從有份工，收入穩定，我哋一家嘅生活都獲得改善。」
政府應加速改善
香港職業發展服務處就業經理鄧少平表示，常遇到有婦女需工作幫補，但又無法兼顧年幼子女的個案。鄧少平鼓勵僱主增加僱員上班時間的彈性，這樣有利於招聘人手，而政府應積極改善雙職婦女的就業環境，如拓展兒童暫託服務。
檔案編號﹕0427001
蘋果日報慈善基金
電話：29908688
傳真：37112468
電郵：mailto:[email protected]
網址： http://charity.atnext.com
蘋果日報慈善基金接收捐款戶口
恒生銀行：368-006565-001
中國銀行：012-898-00067655
滙豐銀行：580-198836-001
渣打銀行：447-0-667059-3