社民連主席黃毓民噚日出席一個名為「新一屆立法會能否拯救香港？」嘅研討會，有好多人都擔心佢下個月宣誓入立會後追住人鬧，連早前葉劉就表明「好驚」毓民，但原來毓民最大目標係另有其人。佢噚日話，今次殺入立會，一定會為選佢入去嘅一成選民，大鬧林D9係「狗官」，因為林D9雖然月𢭃30萬人工，但永遠只識做「人肉錄音機」，講來講去都係嗰幾句。
毓民黨友長毛同五名示威者被指喺舊年衝擊孫明揚官邸，控以非法集結罪單案，聽日就會判。毓民話，長毛如果判監達三個月，就會即時冇咗議員資格，但就算判罰社會服務令，長毛都未必會接受，就為呢項控罪根本係條惡法，所以一定要抗爭到底咁話。