每個成功男人背後總會有一個女人，立法會新貴謝偉俊（阿Paul）背後嘅女人，當然係白姐姐白韻琴喇！阿Paul選到旅遊界議員，白姐姐一直好識做，將榮耀全歸於阿Paul，佢話自己冇畀過意見、冇幫過手，更加對政治毫無興趣。不過，白姐姐呢個「沉默的賢內助」角色，噚日上電視嗰陣就露咗餡。
話說阿Paul同白姐姐一齊去有線電視接受飛哥李鵬飛訪問，雖然白姐姐口口聲聲話自己對香港政治冷感，唔會過問honey嘅立法會工作，但當飛哥質阿Paul嗰陣，白姐姐就多次忍唔住口插嘴幫拖，有時甚至同阿Paul聲叠聲，阿Paul要讓佢講完至有得講。
暗踩長毛係老粗
好似飛哥講到，有人形容阿Paul係旅遊界長毛，白姐姐就搶答：「長毛冇選擇至要搶位啫，阿Paul有選擇唔使咁辛苦。」白姐姐所謂有選擇，係指佢honey係律師，大把高招發炮，使乜抬棺材？暗踩長毛係老粗之餘，白姐姐仲質番飛哥轉頭：「謝偉俊冇做過（鬧人、抬棺材），你見佢幾時做過？」
阿Paul又批評副局長同政治助理上任後潛晒水，應該出嚟前線鍛煉吓喎。喺節目上已經講咗話冇留意香港政治新聞嘅白姐姐即刻附和：「你睇馬時亨初出道都俾人鬧喇，後來不知幾受歡迎。」傳聞佢哋兩位已經註冊結婚，無論真唔真，呢一招夫唱婦隨都表現得相當揮灑自如。
喺政界打滾多年嘅金勞詹詹培忠，曾經提醒法律超人，一旦做咗尊貴議員，日後都係少啲帶埋白姐姐出場，以免公眾覺得佢從政只係玩玩吓。睇嚟金勞詹嘅擔心唔係多餘，雖然白姐姐話阿Paul有獨立思想，唔會聽任何人指點，「我話想去邊間餐廳食嘢，佢都唔聽㗎。」但八方噚日睇佢兩位嘅表現，覺得白姐姐對公共事務嗰顆火辣辣嘅心，分分鐘勁過阿Paul；睇嚟旅遊界嘅選民今次投嘅一票，隨時係買一得二。
mailto:[email protected]