金融海嘯加上東亞疑似擠提，兵荒馬亂之際，冷不防有支毒箭射出，目標係財爺鬍鬚曾，蜚短流長質疑佢功力不足，頂唔住呢次危機。鬍鬚曾噚日喺自己個blog度反擊，話以前唔少工作都同財金經貿系統有關，87年至91年，曾任當時財爺翟克誠（PiersJacobs）政務助理，80年代中，喺經濟和金融科工作，仲喺證券及商品交易監理專員辦事處（證監會前身）工作，負責加強小投資者的保障。
由於做過呢啲工作，鬍鬚曾話佢十分明白小投資者感受，對於東亞存戶排長龍提款，佢話諗起《曾參殺人》故事，呢個故事好多人都知，八方唔複述，總之鬍鬚曾呼籲市民唔好誤信謠言，更引述已故美國總統羅斯福金句：「唯一要恐懼的東西，就是恐懼本身。」