楊千嬅加入東亞集團後，她覺得自己恍如學校裏的學生，要面對兩位導師，她形容林建岳猶如一位對學生持開放和放任態度的校董，黎明則是傳統校長，對學生既保護又嚴格，在他們監管下，她已經沒有以前那麼任性。 撰文：陳月媚
事業篇
兩位老闆一收一放
楊千嬅由黃柏高的金牌公司過檔到林建岳旗下的紅館整整兩年，她的歌唱事業全部掌握在黎明旗下的唱片公司AMusic手中，兩年合作以來，一直傳出雙方在製作上經常出現意見分歧，關係十分糟糕，好像黎明11月會舉行的三場演唱會，請了衞蘭兩姊妹和光良做嘉賓，惟獨沒有請她，似乎有些事情並非空穴來風。
黎明嚴格 岳少寬鬆
當事人楊千嬅說：「我對黎生真係冇嘢，只不過做第一張碟時，我哋創作上有意見分歧，雙方的確需要一啲時間去協調，但做第二張碟時，基本上已經可以溝通得幾好，我會盡量尊重佢嘅意見。所以製作第二張碟時，過程順利好多，我唔明點解啲人成日會覺得我哋不和。」
這兩年千嬅轉了新公司，她要適應林建岳與黎明兩個不同性格的老闆，有別於以前只應付黃柏高一個人那麼簡單，不知道她可覺辛苦，千嬅日前笑說：「感覺上我好似入咗一間學校讀書咁，黎明就好似係較傳統嘅校長，對自己學生好保護，要求好嚴格，樣樣嘢跟得好足，唔想學生有任何犯錯機會，林生比較似國際學校嘅校董，採取較放任同開放態度對待學生，有時明知學生會做錯嘢，又明知道話班學生都唔會聽，佢就索性俾你去碰釘，等你受吓教訓，佢先慢慢同你講耶穌。」
千嬅不忘維護老闆說：「其實校長同校董各有各教學方法，好難講邊個好啲，不過我同佢哋合作過，其實佢哋都係出心想幫學生成材，所以我會好尊重佢兩位。
反覆試唱 不可馬虎
「好似黎生咁，真係落手落腳幫我張唱片做好多幕後嘅工作，佢由選歌到唱片封面都會參與意見，有一首歌我唱極都唔合佢嘅要求，我都唔記得重唱咗幾多次，同佢做嘢絕對唔可以馬虎。」
愛情篇
大難不死最愛自己
在楊千嬅的感情世界，鄭中基已成為過去式，丁子高是現在式，縱使身邊大部份人不看好，近年來她的名字還是經常與丁子高拉在一起，甚至傳出婚訊。
究竟千嬅是否真的視他為結婚對象？且聽她自己交代：「我同丁子高係好朋友，你哋唔好講到咁誇張，我同紅館仲有合約，𠵱家我都係以事業為重。未想過結婚呢個問題。
「早幾年我真係好有結婚衝動，而且好想做飛女咁，坐住架電單車同自己鍾意嘅人直奔涯邊行禮，幾浪漫呀！但𠵱家年紀大咗，冇咁任性啦，再加上呢一刻我最愛嘅人係自己，做乜嘢都會諗得清清楚楚。」
任性小花 學懂珍惜
近兩年來，千嬅的確不像以前般任性，在金牌公司的時期，遇到不開心的時候，她會突然買張頭等機票飛去倫敦跟朋友吃一頓晚飯，然後又搭飛機回來，嚇得經理人公司半死，千嬅說：「𠵱家英鎊咁貴，好少飛倫敦啦！你估任性唔使花錢呀，年紀大啦，要慳啲使！其實做咗呢行都咁多年，唔會乜嘢都唔顧。」
千嬅性情變了，跟她6月時坐保母車回家途中被大樹壓車頂大難不死有很大關係，她說：「呢次大難不死，其實我都得到好多啓發，人生苦短，世事無常，兩個月後，有一位女大學生就冇咁好彩，佢喺街頭俾棵大樹壓死咗！睇到呢則新聞，再諗番自己，個心好唔舒服，原來好多嘢你係預計唔到，人真係好渺小，大家係咪應該好好珍惜身邊嘅人呢！」
年紀漸長 不再執着
千嬅奉勸大家不要帶着遺憾完成一生，最近她推出的新碟，其中有一首歌叫《明日再會》，錄這首歌時，千嬅有很大感觸，她說：「呢首歌嘅意思係講有啲嘢過咗去就追唔番，所以做人唔好太執着，唔好令到自己有遺憾。
「我記得上年喺演唱會唱舊歌《少女的祈禱》時，雖然唱功係比以前進步咗，但當時我覺得自己完全唱唔番以前嗰種少女情懷，所以我係好失落。年輕人真係要珍惜呢種純真情懷，但我發覺𠵱家好多人思想有太多沉澱，唔會好直接去表現情緒，太壓抑啦！記住千萬唔好畀太多枷鎖自己。」
展望篇
集中火力內地發圍
未來一年，千嬅會把戰場主力放在內地，除了年底會與內地大腕張國立合作演出劇集《紀曉嵐4》外，還計劃推出普通話唱片，千嬅說：「其實今年初開始公司已經幫我鋪排發展內地市場，但因為今年遇着中國舉行奧運，所以好多嘢都進行唔到，雖然進度係緩慢咗，但我對公司有信心，一切等公司安排啦！
「我喺年尾仲會返北京學武，因為喺套劇入面，我武功高強，所以演出前都要做吓準備，到時有時間，我希望可以再搵老師進修吓普通話。」
檔期不合 緣盡小天
其實除了內地劇集，聽說台灣有電視台想找千嬅跟現時台灣當紅小生阮經天（小天）合作，但最後因為撞期，經理人公司為她推掉這次合作機會，千嬅矇查查說：「係咩？公司只係同我講過有電視台搵過我拍劇，因為撞期，公司話拍唔到啦！我都唔知合作嘅對手，我知阮經天係邊個，好多朋友都睇過《命中注定我愛你》呢齣劇，所以我都知呢齣劇好受歡迎，知道𠵱家阮經天喺台灣好紅，如果將來再有機會，我都希望可以同佢合作！」
