我哋係德昌森記林氏三父子，係做蒸籠傳人第四同第五代，第一代就喺廣東農村做竹具，包括蒸籠，第二代因為廣州茶樓興旺，去咗省城發展，戰後中國解放，第三代就嚟到香港發展，到𠵱家都成60年。60年來，其實香港嘅飲食業興旺，又有唔少人移民到海外發展，所以客源遍佈全世界，好多移咗民嘅舊客都會嚟幫襯，竹蒸籠做咗過百年而不衰，係因為用竹籠蒸嘢，可以存熱保濕，放竹籠嘅點心，唔會起水，回籠再蒸都唔會走樣，所以好多飲食對出品有堅持的食肆都會繼續用，竹蒸籠係唔會被淘汰，不過手作行業辛苦，香港已經無後生仔入行，因此由一條竹開始，識做一個手作蒸籠都係得番我哋幾父子，所以我哋都好自豪，可以保留一啲傳統手藝，可惜只怕後繼無人。
德昌森記蒸籠進出口（25488201）
西環西邊街12號地下