陳奕迅（Eason）爸爸、房屋署前總屋宇裝備工程師陳裘大，因為貪污受賄而被判監6年，今年2月陳裘大被診斷患上肝癌後，曾經以肝病為由向上訴庭申請減刑，但最後被駁回。近日有傳陳裘大病情日趨嚴重，已獲准提早出獄，但上星期二記者就見到Eason一個人去赤柱探監，當時佢全程眉頭深鎖，心事重重咁樣。
「呢啲唔講」
Eason聽晚會喺北京工人體育場舉行巡迴演唱會，噚日下晝4點，Eason喺助手陪同下喺機場出現，準備飛去北京開騷，見佢全程笑笑口，心情冇乜異樣。問佢爸爸陳裘大嘅情況點樣時，Eason話：「呢啲我唔講。」然後揮手同傳媒講拜拜。馮仁昭噚日打電話畀Eason嘅經理人陳家瑛，問Eason爸爸陳裘大係咪出咗獄，佢話：「私人嘢唔回應。」
噚日繼續有大批傳媒喺赤柱監獄外等候，其間有懲教署職員同傳媒講話：「明年今日都出唔到㗎啦，除非有好特別情況，例如病到好嚴重咁啦。」
此外，Eason同蔣雯麗早排喺重慶拍攝電影《秘岸》，由於天氣太熱，佢哋拍攝一場車廂親熱戲時搞到大汗叠細汗，好辛苦。
