英雄唔一定要策馬舞劍救美人，新登陸香港嘅娛樂指南《TimeOut》慶祝40歲大壽，全球各地嘅分社各自選出40個城巿英雄，香港當選者非常咁跨階層同埋多元化，由搭棚師傅到天王巨星，由動物權益鬥士到傳媒巨擘，MC仁、軟硬天師、周星馳、周潤發、許冠傑、俞琤、查良鏞、邵逸夫，同埋八方老闆黎智英等都榜上有名。
肥佬黎得獎，坦言自己都覺得奇，話自己只係關心香港，做緊好多香港人都會做嘅事，指佢犧牲其他嘢言重了。
佢又話唔少人覺得佢淨係製造麻煩，冇可能係英雄，反而老友馬丁真係犧牲咗好多。記者問佢退休後，《蘋果日報》會變成點，佢話唔知，總之有佢一日《蘋果》都會企硬。
今次呢個英雄獎同香港好多選舉一樣，由開始到完結都冇乜人知，八方睇完40個得獎者嘅資料同埋部份訪問之後，覺得佢哋最大共通點係大家覺得個獎好莫名其妙，有得獎人直情話知道自己當選，除咗笑之外唔識反應，唯一喺受訪時覺得好榮幸得獎嘅，係麥兜。