立法會係最矚目政治舞台，秘書長馮載祥（Ricky）94年做呢份工，旁觀14年，今年退休，噚日最後一日返工。佢由港英時代立法局，過渡至回歸後立法會，經歷兩個朝代三個主席，自言是「場務經理」，「喺呢個舞台，議員先係主角，我只係幕後人員。」
Ricky先後同三個主席共事，佢認為立法局主席、資深大律師施偉賢（JohnSwaine）好專業，若有議員挑戰其裁決，雙方可能辯論深奧法律觀點，「我坐埋一邊得個聽字。」另一位主席黃宏發係學者，Ricky指佢熟悉各國政制同議會運作模式，同秘書處合力將《議事規則》繙譯成中文，「過程好艱難，但都算譯得幾好。」
開會時間越來越長
Ricky同范太共事最耐達11年，佢話范太多人讚毋須錦上添花，總之范太政治智慧好高，「壓得住個場。」至於其他議員表現，Ricky坦言唔想評論。對於回歸前後議會文化轉變，佢話最明顯係開會時間越來越長，十幾年前佢初加入秘書處時，下晝2點半開會，4點就散會飲下午茶，5點收工，「𠵱家連續開兩日會已經算短。」會議冗長，Ricky話好正常，因為個個議員都要發言向選民交代，預期新一屆立會變本加厲，「因為多咗好多新議員，要爭取機會表現。」
14年前上任時，Ricky認為最重要係帶領秘書處職員過渡97，佢噚日話成功做到。回歸前後一段日子，壓力最大，末代立法局日以繼夜開會，緊張又刺激，散會後回家冲凉，攰到跌咗落地。白頭宮女話當年，Ricky笑言當日脫離公務員隊伍加入秘書處，係因為想喺樓底甚高嘅立法會大樓返工，可惜日後新大樓落成，佢無緣使用；另一遺憾，係立會周三例會，令佢唔可以入馬場，錯過拉頭馬機會。退休後佢話唔會從商，只想「躍馬逍遙，享受人生」，專心湊孫、練習結他同入馬場。
各黨派議員喺「舞台」上拗餐死，Ricky話秘書長一定要政治中立，佢自言做得到，因為不論甚麼人上台，場務經理工作如一，"Memberscomeandgo,I'mhereforever."
mailto:[email protected]