美國經過今次金融海嘯洗禮之後，有人認為華爾街時代已宣告落幕，畢竟當地傳統五大投行已去其三，往後縱然華爾街能重拾輝煌，內裏的一切已不比當年了。既然美國經濟有排都難以睇好，全球經濟又會點行？那一個會成為投資人士注目的市場？
好多人都期待中國市場，因為歐美經濟內創不輕，休養生息重展活力起碼都要一段時日，所以預期環球資金對中國市場會望多兩眼，亦寄望內地能帶動全球經濟增長。雖然能否做得到仍未知，但從投資角度睇，中資股應是未來入市首選。
不乏芬佬捧場
在選股方面，上市日子尚淺的中國南車（1766）頗具留意價值。近期股海大波動，惟中國南車期內表現相對較穩，波幅範圍只介乎2.50元至3元之間，散戶即使在公開招股時以每股2.60元認購，持貨至今一直唔走，總算有驚無險，依然贏錢。
南車係內地最大鐵路軌道設備生產商之一，與「北車」分庭抗禮，近乎壟斷全國市場。南車亦擁有內地鐵路電氣化概念，具市場領導地位，上市以來一直不乏「芬佬」捧場。股海熊市主調未過，入市可選高增長股，不妨吼位低吸南車，中長線目標暫睇5元。
方星俠