無論甚麼年齡、性別，全港7百萬人都一定聽過「賽馬會」，未夠年齡賭的小朋友唔識？每個周末爸爸霸着電視睇馬、媽媽話今期有六合彩金多寶、哥哥睇波爭住上網要落注……沙田馬場更是約60萬人口的沙田區的開荒始祖，一路陪伴着沙田居民成長。10月7日就是沙田馬場落成三十周年，這30年來的變遷、難忘、愛和恨、輸和贏，一一由他們說起。
記者：許維雅
攝影：王文忠（部份相片由香港賽馬會提供）
1978年10月7日祿怡衝線
沙田馬場開幕日，灰馬「祿怡」成為第一次贏出「沙田盃」的馬王，衝線一刻贏出成個馬位。
馬主 祿怡馬主30年愛與恨
今年81歲的容永道是退休會計師，他與羅兵咸合併的會計師事務所是國際著名四大會計師行之一，他的愛駒「祿怡」更曾為沙田馬場寫下光輝的第一頁。拉過34次頭馬的容生，私人名下曾擁有過11隻馬，由祿怡勝出沙田馬場開幕日的首項錦標賽「沙田盃」開始，他就見證着沙田馬場這30年的改變。「祿怡出賽31次，只有3次三甲不入，取得15次冠軍，我錫到佢燶，並非因為錢，我係真心錫佢。佢82年退役，我出錢養了佢10年，先後放佢在DragonHall、上水BeasRiver過退休生活，有地方佢跑，仲畀錢請騎師操佢幫佢保持狀態，我定時定候帶一大堆紅蘿蔔去探佢。」祿怡帶給容生的歡樂從他細說一點一滴時表露無遺。有愛亦有恨，「最唔開心馬會的HandicapSystem，曾經要我隻祿怡孭154磅出賽，8歲仲要比隻4歲馬孭重30磅讓賽，十分肉赤，唔希望搞到要人道毀滅的下場，最後我決定retirehimatthetop。令我遺憾的，還有馬會刪除了祿怡的比賽紀錄，明明時間一樣，即使之後有馬跑同樣時間，都無理由刪除我隻馬個名。」時代唔同，人事都已變，容生慨嘆又無奈：「我好懷念30年前馬會的架構，以前做fullmember係身份象徵，做馬主要有相當class，𠵱家係人都做得。潮流要大眾化，鼓勵團體申請買馬，吸引更多人參與賽事，為確保投注額，無可厚非。但睇見𠵱家拉頭馬，閒閒哋20人走埋去，張相越拉越闊，隻馬同騎師細到影都無！加上𠵱家養馬的人心態已變質，好多馬主當馬係搵錢機械，我話你知，養馬一定蝕本，買隻馬閒閒地500萬，養馬費平均二、三萬一年，你計吓要贏幾多次頭馬先回本？」
練馬師 與馬不分離的一生
葉榮光（Leo）由78年沙田馬場落成就加入馬會，一做30年。現任吳定強馬房助理練馬師（俗稱No.2）的Leo，今年50歲，半世人與馬為伴，卻稱起初不是愛馬之人，「後生時無所事事，決定入行因為覺得馬會係鐵飯碗。初入來，周圍只得一個瀝源邨，開工要由沙田火車站行路軌返宿舍，𠵱家乜都變晒，馬房都多了幾倍有24個。」30年來，做過釘甲匠、馬伕（馬房助理），一級一級升到現在No.2，「由英皇御准到自己御准，改變真係好大，樣樣講求制度化，操練時間又密，返工時間監管得更嚴格，一定要4點前返到去。咁多年最難忘係94年5月15日第一次帶『勝利拍檔』去日本參加安田紀念賽，雖然贏唔到，但好開心香港馬第一次過日本跑，又感受到日本馬會的細心、專業及幹勁，更見識到外國人點照顧隻馬。」每日面對比賽，對他人生影響甚大，「我成世人青春在此，所得益不是有錢買得到，人生觀都有改變，每樣事都訓練得認真對待，同時亦學懂看透贏和輸，人生要經歷的比賽比別人多，好多事都係能力控制之外，盡力便可，唔同以前咁睇唔開。」
馬評人 8歲唔睇卡通睇賽馬
自稱8歲開始睇馬因為屋企人做報館，沙田馬場開幕後，周末返屋企扭開電視，唔睇卡通睇賽馬。89年開始接觸馬評工作，為《大贏》馬報寫馬評的豪仔，由600隻馬講到現在1,200隻，經歷馬場不同年代，作為馬評人，相信有造馬黑幕嗎？「時代唔同，馬會透明度高咗，知多好多但又知唔晒，加上馬迷知識多咗，起了監察作用，唔似以前的馬圈風暴咁離譜。當年有騎師到終點前一刻拉停隻馬都試過，𠵱家馬會動作慢啲都俾人嘈。」馬評人畀貼士馬迷，相信自己眼光又點會唔落注？豪仔笑稱「我哋呢行一定有賭，最勁試過中三重彩贏9萬元，我唔識賭得太複雜，越複雜越易輸錢，我係貼邊隻跑出的馬評人，另一類馬評人係教人點買馬，睇賠率利用賭法贏錢。」
員工 棵棵樹我都有份種
由沙田馬場第一日開幕做到出年退休，見證住馬場和沙田的發展的蓮姐，馬場以至彭福公園周圍的花草樹木都由她一手包辦，「以前要種樹，大大棵搬落斜路，日頭曬大雨淋，30幾度啲蒸氣攻上來，好陰功㗎！馬場當年起好請人種樹，我咪走入來做囉。我以前識唔識種樹？我耕田㗎！圍村大，點會唔識！」做了三十年，對沙田馬場，蓮姐自言沒有大喜大憂「最開心係以前六、七十人一路種一路傾，日子過得好快。𠵱家啲樹種落晒都唔使咁多人理啦，得番20幾人。馬場畀啲乜我？哈哈哈，乜都有啦，有錢囉！日日返工對住啲花咁多年都有感情，由一堆黃泥變到𠵱家周圍有花有樹，第時會返來探吓工友啦。」
沙田馬場十大事件簿
1973/12
興建沙田馬場工程全面動工，花了4年10個月時間把沙田海一段水域填為一座大馬場。當年這項香港最龐大的單一填海工程，採土1600萬噸，夷平沙田4個山頭，填海獲地達250英畝，成為整個沙田新市鎮規劃的延伸龍頭。
1978/10/07
沙田馬場落成，當年港督麥理浩爵士伉儷為馬場落成揭幕。當天共有6場賽事，三屆馬王「祿怡」於當天勝出首項錦標賽「沙田盃」。
1986/10/22
英女皇蒞臨沙田馬場主持「女皇盃」頒獎。
1997/06/15
10場賽事投注額超過2,542,642,000元，成為歷來最高。全因三T約7億彩池將不會累積帶到回歸後的香港賽馬會，吸引馬迷瘋狂投注，容永道也用了260萬大包圍這次三T賽事。
1997/09/06
香港特別行政區成立後首個賽馬日，首屆特首董建華主持開幕及作第一場賽事「特首盃」的頒獎嘉賓。
2000/02/07
這天是千禧年初三賀歲賽馬日，沙田日場的入場人數高達102,642人次，成為歷年之最。
2002/12/15
這天香港國際賽事日中，香港賽駒於4場國際賽事中取得3場冠軍，揚威國際馬壇。
2003/08/31
全球最闊的彩色大螢幕啓用作直播，方便馬迷觀賞，更榮列健力士世界紀錄。
2004/11/14
改建後，全球首個設有可開合天幕的馬匹亮相圈（俗稱沙圈）啓用，耗資約4億元興建。
2005/04/24
「精英大師」取得第17場連勝紀錄，創下賽馬比賽歷史。
小八卦
馬名叫「輸梗」得唔得？
馬名經常成為討論話題，朋友好奇改啲反常馬名，唔知得唔得。原來馬會只有3大原則：必須4隻字內、不能用以往馬王的名字、不可有宣傳字眼。但副練Leo卻哈哈大笑未聽過有馬主倒自己米：「叫『輸梗』？點會有人改個名俾人笑㗎，養馬的人都係要威要贏。唔知得唔得，最後都要經馬會審批。」
馬匹身價升100倍
以前買馬只可以由馬會安排，只有高價馬5萬元、平價馬2.5萬元選擇，77年之後才有自購馬，馬價亦開始越升越高，現在約500萬元一隻，30年漲價100倍。
78年生有機贏金幣
香港賽馬會將於9月28日在沙田馬場舉行大型慶祝開幕禮，除有運動員及歌手表演外，當日於第5場賽事開跑前入場的人士，可獲贈一代馬王「祿怡」的珍藏版相架乙份，而1978年出生的人士就有機會贏取價值港幣3,000元的「沙田馬場三十周年」紀念金幣乙枚，場內更會有限量版「沙田馬場30週年紀念封」發售。
馬會顧客服務熱線：1817
