轆Book：<br>獅城直擊　新達城車展玩甩尾

轆Book：
獅城直擊　新達城車展玩甩尾

新加坡呢期至巴閉，成為全球首次F1夜間比賽場地，既舉辦連串活動配合賽程，連不嬲喺每年11月舉行嘅車展都提早登場。眼見展場細細，初頭諗住無乜睇頭，殊不知驚喜連場，有甩尾表演兼Launch咗幾部新車，開心！

記者、攝影：梁美甜
鳴謝：ImageMotor（HK）Ltd.

富士全新車系

車展喺新達城展覽中心舉行，玩到10月5號為止，展場唔算大，三個日本品牌富士、本田同日產已經佔三分二場地，當中以富士最多驚喜，同步Launch咗部獨立開發七座Exige，呢部集七人車、旅行車同埋SUV四驅特色於一身嘅新車，於日本本土有2.0i及2.0GT兩個型號，馬力輸出最高可達148匹同225匹，水平四汽缸引擎底盤、四前速Sportshift加減自動波箱等配備，均源自同廠Impreza，操控同性能有保證。代理話Exige2.0GT大約出年2月引入香港，大家拭目以待啦。同時，富士亦推出全新四門Impreza，原廠分別有1.5R及2.0R兩個型號，如無意外，下個月香港會引入2.0R四門房車，切合車迷口味。

■車尾擾流尾翼，有助減低風阻。

■七座位，內櫳好闊落。

■大一大個天窗，視野開揚。

■中控台唔算豪華，勝在User-friendly。

■外觀線條順滑，白色車身夠搶眼。

驚險單邊轆

留住車迷梗要花心思，大會安排StuntPerformance表演環節，由號稱WorldNo.1PrecisionDriver嘅RussSwift同仔仔阿Paul拍住上，大家依然睇到目不轉睛。眼見三部車越夾越埋，心諗會唔會撞㗎？吱吱聲甩住轆掟住行，堅！跟住甩尾泊L位，頭泵把貼前車尾泵把，勁！再嚟單手，唔係，係單邊轆行車，坐足四五個人，堅，抵有咁鬼多掌聲。