記得𡃁仔嗰陣，亞記有個節目幾弔詭吓，就係乜都唔使諗，擺部Cam響魚缸前面怒拍，成為至今唔少人仍津津樂道嘅《魚樂無窮》。舊時PS都有隻喺汪洋大海度寫意游嚟游去嘅遊戲，由於旨在消閒無乜實際嘢玩，坊間就直接美其名《魚樂無窮》。事隔多年佢終於碌落PS3度，遊戲目的明確番唔少，想去馬爾代夫探險但又周身無蚊，不妨搵呢隻代用品頂住檔先，隨時鐵達尼寶藏都係靠你搵番出嚟！
文：陳福榮
探究海底之謎真相
多年來被戲謔為《魚樂無窮》嘅《Aquanaut'sHolidays》，按字面解即係水底觀察員假期；今次副題寫住「隱藏紀錄」，似乎唔再係漫無目的咁喺個海度亂游任Hea。遊戲舞台發生喺南太平洋嘅大型環狀礁群，唔單止係保持住獨特生態嘅封閉式海洋環境，適合用嚟了解水中生物活動情況，而且呢度傳說曾為海盜秘密基地，話唔定可從建於不同年代嘅水底遺蹟中，睇番各個神話故事嘅歷史痕迹，甚至發掘價值連城嘅遺物。玩家喺得到一名記者嘅通知下，得悉獨自進行海底研究嘅學者阿標突然失蹤，睇過部份留言之後，便經由佢留低嘅潛水艇深入「AquaHeaven」，繼續尚未完成嘅任務。
超級潛艇檢視生物
由於眼前嘅行動目標，一方面要承繼阿標遺志做埋並未完成嘅任務，另一方面希望透過找尋佢嘅過程中了解點解佢會失蹤，所以除咗睇班海洋生物外，當去到唔同區域冒險就會追加不同副線劇情，從而增加遊戲性。為咗便利行動，與其就咁潛落水咁危險，都係借助配備方向探測儀器嘅潛水艇「海豚2號」比較好。
咪住！點解隻艇叫2號嘅？原來阿標之前駕駛嘅係1號，收錄喺資料庫嘅所有數據都係佢整出嚟，因此大家要好好打呢份工，令阿標後繼有人。
機種：PS3
廠商：SCE/Artdink
類型：SLG
人數：1人
價格：約430港元
