無綫昨日舉行大型記者會，正式宣佈進軍韓國市場，在韓國開發頻道專門播映港劇。無綫為增氣勢，昨日安排旗下一眾小生花旦晒冷撐場，卻造就了緋聞女王「姣佘」佘詩曼成為風頭躉，會上她以無敵姿態一拖三，與先後傳緋聞的鄭嘉穎、吳卓羲和馬德鐘同場，姣佘淡定大方，鄭嘉穎黑面，吳卓羲似執到金，馬德鐘則裝作置身事外，三王一后的態度大相逕庭。
藝人拍劇撻着時有發生，昨日無綫假將軍澳電視廣播城舉行「TVBI、CMB跨國合作TVBKorea頻道」記者會，宣佈港劇正式進軍韓國。為隆重其事，無綫安排旗下小生花旦傾巢而出，包括佘詩曼、徐子珊、楊怡，陳敏之、陳豪、鄭嘉穎、吳卓羲、馬德鐘和黃宗澤等，但眾星男女關係七國咁亂，尤其姣佘與因拍劇傳緋聞的鄭嘉穎、吳卓羲和馬德鐘三位緋聞男友同場，更是妹仔大過主人婆，成為整個記者會的焦點。
起哄讓座
陳豪變夾心餅尷尬
除阿佘的多角關係外，同場又有同樣因結戲緣傳緋聞的馬國明與徐子珊，另一緋聞男女黃宗澤和胡杏兒本也有機會同場，惜因記者會延誤令胡杏兒未能出席。
雖然昨日緋聞男女多籮籮，但無綫早已悉心安排座位，令阿佘與三位新舊相好保持距離。初時阿佘與鄭嘉穎中間夾着陳豪，但陳豪表現得相當尷尬，幾番起哄後，陳豪終退位讓阿佘與新鮮熱辣的緋聞男友鄭嘉穎同坐合照，現場見鄭嘉穎笑容牽強，阿佘則由笑咪咪變成面紅耳熱，至於阿佘的另外兩位過氣緋聞情人馬德鐘和吳卓羲，則被安排坐在另一方。
當一眾藝員歸位後，阿佘與並肩而坐的陳豪不斷耳語，其後眾人上台，阿佘與扮作跟緋聞無關的馬德鐘有講有笑，相隔幾個身位的鄭嘉穎則木無表情。
會上無綫播出劇集《最美麗的第七天》中鄭嘉穎與被傳甩拖的周麗淇之親密片段，鄭嘉穎煞有介事地昅實螢光幕，顯得不太自在。至活動尾聲時，阿佘應邀與鄭嘉穎、吳卓羲及馬德鐘合照，阿佘大方企定定等候，吳卓羲猶如執到金般搶先埋位，至鄭嘉穎經三催四請肯站近阿佘時，吳卓羲即讓出中間位，可惜馬德鐘未及埋身，無綫經理人已趨前緊張解圍，並拉攏其他藝員來大合照。
大方淡定
樂見新歡舊愛同場
面對三位新歡舊愛的阿佘昨日全程淡定，直言未感尷尬，她說：「有乜嘢尷尬！你哋差啲推到我落台就尷尬，如果個個都尷尬都幾麻煩。」問到她與嘉穎目前的關係時，她說：「向來都係好同事同朋友，阿Ron（吳卓羲）就係同事同朋友。」其後阿佘以好男仔稱讚鄭嘉穎，但問她是否已跟吳卓羲畫上句號時，她說：「唔該晒！冇寫過點畫上句號呀？」
鄭嘉穎昨日則明顯面露不悅，對於自己一直笑容牽強，他說：「你見得我少喇，我不嬲都係咁，合照當然唔介意，反正大家係同事。」問鄭嘉穎對吳卓羲和馬德鐘有何感覺時，他說：「全部同事，冇乜嘢呀。」此外，有網民爆鄭嘉穎昨日凌晨駕車返西貢寓所時遇水浸，指當時阿佘也在他車內，鄭嘉穎稱不再回應緋聞，阿佘則說：「我冇去過西貢。」又謂前晚自己與高層樂易玲及韓國電視台代表一起，但同場藝員中確有鄭嘉穎。
採訪：王祟穎、卓寶花
攝影：陳志嵐、陳順禎
話你知：韓國開發港劇頻道
無綫昨日舉行晒冷記者會，宣佈TVBI與韓國CMB合作，開發TVBKorea頻道，於今年3月開始在韓國播放無綫熱門劇，而即將在韓國播放的第二季無綫劇集，包括在港剛播出大結局的《溏心風暴之家好月圓》（圖）、《東山飄雨西關晴》及《與敵同行》等。而CMB在韓國舉辦的《親親青少年音樂大賽》中，也有港星參與，國際中華小姐季軍徐萌代表香港出賽，得到2008年度冠軍。
