英超兩大石油大軍車路士同曼城，周三聯賽盃第3圈命運迥異，車仔輕取樸茨茅夫4蛋；曼城就畀英甲嘅白禮頓淘汰，賽後領隊曉士仲大鬧球員：「捉到鹿唔識脫角」！
阿巴首季一樣冇盃
我求大俠都明曉士心情，因為阿聯酋老細阿布札比集團幾日前先入主，球隊就冇咗個錦標；作為一個普通打工仔嘅曉士，點可能唔發火？「我哋要專業啲，一球領先都守唔到尾；明明控制大局都要輸，好多人要查找不足！」究竟場波點發展？首先基爾臣費南廸斯64分鐘為曼城領先，89分鐘被對手追和；加時曼城先落後，結果艾利蘭追平，最後互射12碼3:5被白禮頓淘汰。
其實曉士邊使咁驚呀？阿巴莫域治首季入主車仔，咪一樣兩手空空，最後雲尼亞里都係季尾先拖成喼錢走。而且新老細阿布札比集團委任為會長嘅阿穆巴拉克，講明會尊重曉士，「唔會好似車仔同利記班主咁，教領隊做嘢！」
33歲嘅阿穆巴拉克究竟何許人也？原來佢去過美國讀大學，仲協助阿布扎比巿成功爭取主辦F1同世界冠軍球會盃；佢第一份工為石油公司打工，之後染指房地產致富。有思想咁西化嘅老細，曉士使唔使輸場波就咁緊張先？
所以話，曉士只要平常心對待，冇咗個聯賽盃算咩？仲有英超、歐協同英足盃嘛！只要搶到個盃仔，下季就好可能繼續留低；到時卡卡同C朗入「城」，佢仲唔打橫行？連費蛇都行埋一邊啦！最後我求大俠贈你一句：淡定，有錢剩！