食菌現時十分普遍，因為人工培植技術發達，一年四季都有菇菌供應，尤其打邊爐，春夏秋冬都成為重要配料之一，不過想食最好的菇菌，最好當然是野生的，因為無論香味和質感，都比人工培植的佳，不過野生菌現在差不多到季尾，想品嚐最佳野生菌，係時候最後召集。
記者：張一豪
攝影：周旭文
季尾完熟菌最靚
識食的人都知，7月開始就是菇菌季節，一路到9月告終，但「龍皇」點解會到季尾至大做？找來幟哥解畫，答案都幾出人意表：「第一，其實食菌，季尾完熟，最香最好食，而且全球氣候暖化，呢幾年去到10月中都仲有得食，之後就無，𠵱家食就最靚。第二，我用嘅係新鮮野生菌，唔用亁貨，係供應商喺雲南天然採摘，我唔用人工培植嘢，尤其係大陸，我都唔知佢哋落咗乜嘢落去種植催生，我真係唔敢亂嚟。呢輪毒奶幾大單，我講畀你知，三聚氰胺唔係第一日用，我鄉下有親戚養乳牛，佢哋以前成日話請我哋飲牛奶，我哋要睇住佢哋新鮮揸出來先敢要，因為一桶奶會加半桶水，另外會再在奶中加料，增加產量。我哋今次做嘅全部都係野菌，新鮮運到盡快用，唔係有啲香味會走，質量都變差。」
幟哥的左右手權哥就帶我去睇菇菌保存：「亁菌浸水發好就可以用，但鮮菌保存就要小心好多，絕唔可以濕水，否則幾個鐘頭就會爛，而且要將佢哋放喺抽濕好同通風嘅地方，唔係保存得唔耐，所以我哋一來貨，就會用筲箕放入冷櫃，仲要用亁爽紙巾包住，以防水氣，三兩日內用完，否則會唔靚。呢幾日食老人頭、松茸、雞樅、黑虎掌、野生竹笙同埋黑松露最正！」
太白湯過橋雲南鮮菌$168/份
以淮山、杞子、川芎等煮了一個藥材肉湯，加上松茸、雞樅、野生鮮竹笙等，用過橋方式即叫即做，保留菌本身的爽脆，菌香滲到湯內，十分鮮甜。
雪嶺山色$48/位
野生竹笙比培植竹笙貴很多，每支成本都要$20，一份一支，再釀入雲耳、鮮菇、雞樅等，清香爽口，再伴以菠菜及南瓜汁，清新健康！
黑虎掌菌燉沙巴海螺
$238/2至3位用
新鮮黑虎掌有濃郁香味，有舒筋活血及降低膽固醇作用，連沙巴海螺、赤肉、雞件等去炖，湯鮮味香。
雞樅菌炒生猛老虎鮑
$198/份
一份有兩隻由澳洲黑邊及青邊配種而成的老虎鮑，鮑肉爽甜有鮮味，加上爽脆的雞樅和翠玉瓜，入口爽甜。
黑松露焗走地雞$280/隻
有人覺得黑松露香味太霸道，所以視它如榴槤一樣，有人愛，亦有人恨之入骨。這雞用黑松露去焗，只取其香，濃郁雞汁啖啖松露味。
幟哥：「我用嘅全部都係野生菌，過咗季節就無！」
權哥：「野生菌保存都好重要，先至keep到香味同口感。」
食客有say
彬仔：「經理介紹呢個太白湯過橋雲南鮮菌，除咗啲鮮菌好食之外，啖啖好甘甜，正！」
阿玲：「啲菌好清爽，配合鮑魚食，唔會太搶味，食到鮑魚本身鮮甜。」
龍皇酒家（28952288）
銅鑼灣世貿中心12樓