李彩華（Rain）早前在橫店趕拍內地劇《天地不容》，戲中她有一場被火燒傷的戲份。拍攝當日，阿Rain親身上陣，她的身前身後都有熊熊火光，她日前說：「雖然每次啲火都係高速掠過，因為好熱，感覺好貼近，好似好快要燒到頭髮，所以真係有啲驚，好彩工作人員都做足安全措施。」
特技化妝皮膚敏感
由於劇情交代阿Rain會燒傷臉，她臉上要化特技妝製作大疤痕配合，每次都要花兩個小時上妝，她說：「我係第一次喺塊面化呢個妝，化妝師用膠水一層一層將爛肉、結焦黐上去，睇起嚟幾恐怖，自己照鏡都有啲毛管戙。」
阿Rain更因為化特技妝導致皮膚敏感，臉上長出紅點，她說：「最初上妝感覺膠水好凉，以為好舒服．點知亁咗就掹住啲皮膚，貼上爛肉都唔算好痕，但拍咗全日落妝就有啲痕。」阿Rain後來到了杭州看專科醫生，幸好只是虛驚一場，過兩天便沒事了。
撰文：林妃