我入行都有30年，當時不銹鋼廚具啱啱興起，心諗竹蒸籠無咁襟用都用咗過百年，咁做更襟用嘅不銹鋼籠，加上香港有咁多食肆，我哋又唔只做籠，肯定更加有景啦。講到最好景，就係97前幾年，經濟好似好好咁，樓升股升乜都升，連帶高級酒樓都開得多，我哋好似唔憂做咁，不過97之後，乜都走下坡，政府成日話經濟好轉，其實只係局部好轉，都唔同以前，成個社會一齊好。
而做我哋手作仔呢行，成本越來越高，人手亦越來越貴，本土嘅手作仔工作都已經沒落，好彩叫做有大陸做後盾，將生產線北移，我哋𠵱家做不銹鋼具、蒸籠，可能只係喺香港做加工，或者一啲修理工作，如果整件嘢喺香港生產，就成本太高了。但話時話，𠵱家因為喺大陸做，有啲成本都低咗，所以10年來都無乜點加價，可以話變相平咗，唔係完全無得做㗎，因為香港仲有咁多食肆，買賣還可以，但真係無後生入行。
光輝鋼竹蒸籠廚具（27809980）
上海街275號地下