荷媽李司棋噚日凌晨接受吳君如嘅《嘩！嘩！嘩！打到嚟！2008》訪問，君如喺節目度問司棋姐會唔會接受同性追求，司棋姐話：「點解要接受？男人就係男人，但我覺得男人陣味好臭，我都係聞慣咗自己陣味，亦唔想間屋有其他人嘅味。」
「唔好咁易落叠」
君如又問司棋姐呢世人做過啲乜嘢「super」事，司棋姐笑住話：「埋單（離婚）都好super，我仲埋咗兩次㖭。當時真係好夭心夭肺㗎，我都奉勸啲妹妹仔，唔好咁容易落叠，如果錯咗要由頭嚟過條路會好難行同好辛苦。」佢又話：「雖然我啃咗兩次，但我都相信婚姻會帶嚟美滿嘅生活，不過我唔會再去呢個階段，雖然𠵱家都有追求者，不過好享受𠵱家單身嘅生活，而且阿女（女兒葉子青）又冇叫我再結婚。」
此外，司棋姐噚日喺尖沙嘴為舞台劇《留住百味情》總綵排，仲宣佈加開10月6日一場，現場又預備埋蛋糕同司棋姐及羅冠蘭慶祝生日，司棋姐話其實佢過咗生日，初初以為係同其他人慶祝㖭！今年司棋姐嘅工作排得密密麻麻，佢話打算買架車獎勵自己，仲想做完舞台劇之後旅行。