公民黨選舉失利，黨內籠罩一股低氣壓，幸好近日有好消息傳出，可以冲喜吓咁話。公民黨受年輕人歡迎，助選團中頗多後生仔，有男有女，唔係清一色毒男、電車男，好多人趁暑假幫手助選，除咗吸收競選經驗，仲有意外收穫。
八方早前已經聽聞，公民黨港島競選辦今年桃花極旺，唔係候選人有桃花運，而係班年輕助選團。知情人士透露，有啲助選團員可謂一拍即合，參加一、兩次義工聚會後，已經見到部份人出雙入對，有公民黨中人話，其實開會時已經發現有人成日眉來眼去有啲古怪，估計已經撻着咗，不過真係估唔到咁快囉。
囑滙報拍拖「進度」
助選團成員戀事多，有人笑言唔係壞事，一來助選團人數倍增，因為人人都一拖一嚟做義工，多咗一班生力軍；其次係小情侶們拍拖拉票，唔使諗其他節目，與其去睇戲唱K，不如日日跟住余大狀拉票，可以慳番好多使費，真係一舉幾得。選舉刀來槍往，有啲溫馨嘢調劑吓都唔錯，但如果小情侶公、私不分，卻可能影響到正經工作。
選舉期間，公民黨候選人先後告急，其中黨魁余大狀形勢十分險峻，佢喺自己個blog度自爆，喺佢選情告急之際，聽聞助選團中部份人「戀情」都告急，令佢幾擔心。至於小戀人係因為忙於助選而冷落身邊人，定係其他原因撒嬌耍花槍，則不得而知，至於有冇影響心情，拉票時狀態驟跌令公民黨選情更危急，一般人好難評估，總之最後雨過天青，好快就見佢哋又孖公仔咁拉票。
為期個幾月嘅競選活動轉眼就完，幾段「政治情緣」會唔會開花結果，公民黨中人都話唔知，據講部份人喺外國讀書，放完暑假就要離開香港去開學，要維持異地情都幾花工夫。選舉撮合佢哋，後事如何睇各人造化，不過黨魁余大狀對佢哋戀情好似頗為緊張，擔心好容易就散，叮囑幾對小情侶要定期向佢呢位紅娘滙報拍拖「進度」。咁一旦嗌交，可唔可以搵余大狀擺平呢？定係黨主席關教授說了算？呢啲問題，留番畀黨高層商議，總之第時有機會擺酒，唔好漏咗請余大狀就得嘞。
mailto:[email protected]