昨日東亞（023）現提款人龍，反映港人在金融海嘯之後，人心更加虛怯，稍有風吹草動就心慌意亂。其實除咗存戶驚，股民亦膽怯，昨日不少以往被視為優質穩陣嘅大價股，都被大舉拋售，中興通訊（763）、恒鼎實業（1393）以及雨潤食品（1068），股價都跌約一成。
以上急跌股份當中，雨潤食品被沽算是較易理解，因為內地食品股忽然高危，啤酒股都傳酒類飲品有致癌物質而重挫，雨潤捱沽也就不難理解。恒鼎急跌，則較難令人明白，因為商品價格急升之下，資源股近日大反彈表現都唔錯，獨是恒鼎彈唔起之餘，股價昨竟跌穿9月低位，再創上市後新低。
大行唱好中興都要跌
至於中興通訊則更難明，中興近兩日股價急跌，昨日更加出現勁增兩三倍之成交，反映沽壓的確係幾驚人。壞消息唔多見，反而日前有大行唱好中興，美林發表研究報告，維持中興買入評級，相信集團能維持來自中國電信（728）的30%市場份額。另外，來自中移動（0941）的第二階段TD-SCDMA設備定單陸續招標，預計中興將能維持市場領導地位，獲得35%的市場份額。
儘管全球經濟放緩，但美林認為中興通訊的增長動力將保持不變，這歸功於其在發展中市場的強勁銷售，以及在爭取中國運營商設備業務方面花費的數十億美元資本支出。想來想去，相信都是有不少重量級投資者要沽貨套現，並專揀一些冇乜點跌之股份去沽。冇點跌過之強勢股，現在反而要變成高危股。
歐陽風