近排人人呻身家大縮水，經濟唔好，油價又持續高企，想買車代步，都即時窒步。不過咁，即使時移世易豪唔起，識得精打細算搵平嘢，要做車主一樣有計。我哋就幫你摷出車價平、夠慳油，加埋性能唔失禮，集三大慳家實用強項於一身嘅精明之選。原來仲有得揀！
記者：黎頌詩
攝影：譚盈傑
Model：Joanne
要數全城最筍，首推SubaruR2，上世紀車價，唔使9萬！咁嘅價錢，買到日本車，簡直有啲似天方夜譚。R2車身細小，一直大家嘅着眼點，都係可愛小巧易操控等等……今時今日，揀得小車，就梗係節儉掛帥，其他優點係時候放大。首先，R2用環保引擎，出車稅項已經慳番筆，加上夠慳油，十足本錢對抗高油價，絕對係慳荷包首選。外形上，雖然佢車仔細細兼線條圓渾，但造型精靈，有啲歐洲Feel，大男人揸亦無格格不入。實用性強係最大優點，屬近年熱門嘅五門揭背款式，難得車身勁細但內櫳空間合理，後排亦唔太逼狹。車廂陳設則全屬基本，好處係一目了然，簡單易用，美中不足係膠感頗重。性能方面，658c.c.引擎提供54匹馬力，飆車梗無份，但起步加速表現唔失禮，日常代步肯定夠用。R2推出至今都Keep住有唔少擁躉，多少反映出佢自有過人之處。
規格
引擎：658c.c.直4DOHC
馬力：54ps/6,400rpm
扭力：6.4kgm/4,400rpm
傳動：i-CVT無段變速自動波
查詢：MotorImage（25112727）
Mazda2瓣瓣掂
講樣靚講性能、再睇埋價錢，瓣瓣有嘅一定係Mazda2。Mazda車系自從大變臉後人氣急升，Mazda2明顯曲線玲瓏，造型上有小車中少見嘅貴氣，即使車身迷你，但喺車群中都好搶鏡。內櫳一樣夠魅力，刻意鋪排得像「米奇頭」嘅中控台，有啲跑味之餘又不失趣致。驚喜係103匹推動輕巧嘅車身竟然都有啲威力，攻斜路無「腳軟」之餘，左穿右插都好靈活。乖乖哋用佢代步，得心應手嘅感覺一樣攞晒分。
規格
引擎：1,498c.c.直4DOHC
馬力：103ps/6,000rpm
扭力：14.0kg-m/4,000rpm
傳動：4前速自動波
查詢：萬事得汽車（28931112）
KiaNewMorning贏新鮮感
摷平車，又點少得韓國出品？Kia嘅人氣車Morning，新一代早排先登場，新鮮感贏晒，而且車價亦屬超低水位！老實講，無論賣相同性能，韓國車一啲都唔輸蝕，好似NewMorning，一對圓碌碌超大頭燈就令造型好有獨特風格。規格上較SubaruR2強，不過就同樣內櫳膠感頗重。性能上屬代步車格局，易操控，各方面表現都平穩，唔會叫人失望。最新好消息係，車價由原嚟嘅九萬多元減到唔使九萬。
規格
引擎：1,086c.c.直4SOHC
馬力：65ps/5,500rpm
扭力：97Nm/2,800rpm
傳動：4前速自動波
查詢：KiaMotors（28932326）
SuzukiSwift1.3優惠減一萬
想細得嚟又要夠型格，我會揀Swift1.3。向有「小辣椒」之稱嘅Swift，散發出嘅係點點辣味。外形線條粗獷硬朗，帶點霸氣。內櫳鋪排亦以跑味為主，三幅式軚環、仿桶跑椅，來得較有型格。而最經濟嘅1.3公升版為手動波箱，揸起嚟零舍有型，可以話係型男之選。91匹馬力速度有限，不過勝在操控性強亦慳油。𠵱家更有現貨優惠，原本$119,800嘅車價再減一萬，據聞只餘小量，想出車就要快啦。
規格
引擎：1,328c.c.直4DOHCVVT
馬力：91ps/6,000rpm
扭力：118Nm/4,000rpm
傳動：5前速手動
查詢：香島汽車（23320091）
DaihatsuSirionRacy跑味掛帥
如果要平，賣$110,160嘅Sirion1.3係同系之最，不過數受歡迎，就始終係有齊包圍同定風翼、外形較省鏡嘅Racy取勝。SirionRacy嘅性能同Mazda2相若，價位比後者略高幾千，不過路線各異。同Swift一樣，SirionRacy賣嘅都係跑味，全車包圍加黑框頭尾燈組合都好有型格，只係中控台鋪排似乎有啲呆板。可取嘅係車嘅重心較低，老人家、小朋友上落更便捷，行車掟彎都意想不到的利落穩定。
規格
引擎：1,495c.c.直4DVVT
馬力：103ps/6,000rpm
扭力：14.0kgm/4,400rpm
傳動：4前速自動波
查詢：皇冠汽車（28661020）