即將推出新唱片的楊千嬅，昨日到商台宣傳。她日前在內地節目揀理想情人，她揀了梁朝偉而棄舊愛鄭中基，她說：「如果揀鄭中基，之後會好多新聞，偉仔係好男人典範呀。」
否認搶廣告板
外傳衞詩（Jill）的大型廣告板位置，被千嬅搶去，對於這個「剝Jill」疑雲，千嬅否認說：「呢啲我唔剝㗎，花生我都唔剝，橙都唔剝。我唔興爭呢啲，上進心唔喺呢方面。其實唱片公司幫我哋宣傳係好含辛茹苦，呢啲新聞當宣傳，唔好執着喇。」
對於唱片公司的宣傳方針，千嬅表示滿意，她說：「OK㗎，呢排多咗好多通告，上次又去無綫做宣傳。上一隻碟其實都有宣傳，只係咁啱同電影一齊出，宣傳叠晒唔覺啫，今次就會集中做唱片宣傳。」另外，千嬅表示因高層對質素要求甚高，故其新碟延到後日推出。
採訪、攝影：王連連