新聞報道講自由黨田北俊遭有力人士排擠，幕後推手名叫李大壯。李先生係何許人也，左丁山唔知，只知道佢嘅有力身份來自阿爺輩，因為報紙揭出李先生家世，話佢係張學良姪孫喎。張作霖與兒子張學良是何許人，相信今天年輕讀者已不甚了了，九一八事件（一九三一年九月十八日瀋陽事變）已係七十七年前之事，張氏父子係九一八嘅主角人物，張學良更係一九三六年西安事變主角，有恩於中國共產黨。因為咁樣而令後輩李大壯（何故姪孫不姓張而姓李，可能有段故事，左丁山唔識）得益，聽講在北京有影響力或人脈關係。九月十九日《南華早報》新聞講李先生自稱係中央與香港之間嘅messenger（信差），唔知係自謙之詞還是老實招來呢？李先生嘅英文名有啲奇怪，一般姓李嘅英文係Li或Lee，但李大壯先生嘅英文名係DavidLieTaiChong，左丁山仲以為自己睇錯㖭。Lie係「謊言，謊話，說謊」咁解，以此字為姓李嘅英文譯音，搵自己笨喎。
《南早》引述李大壯話一定要將田北俊排除於自由黨領導層之外，如果田北俊要做自由黨名譽主席，佢一定「揮」到底！何解李田二人如此不和，以前田北俊係自由黨主席之時，李大壯為何不挑戰田少地位，要等到田少落選先至發威？怪不得俗語有云「大丈夫不可一日無權」，權位不在，就有人蝦到上門，相信田少一世人，要到如今先至受到如此羞辱。
資深政治記者L話：「李大壯喺北京似乎有關係㗎，自由黨議員上京見領導人與高官，大大小小都係由李大壯打點嘅。」原來如此，張作霖張學良父子餘威猶存，真估唔到。
記者L又話聽到田氏兄弟飽受中聯辦與一啲大老闆排擠，心有不忿，可能另起爐灶；呢啲傳聞，左丁山半信半疑啫。田大少與二少另外組黨，以兩人之財力及唔使做工做生意都十分富有嘅背景，冇話唔得，但在商界與政界，會碰上唔少阻力，佢哋會搞得好辛苦，怕得不償失噃。但記者L話人爭一口氣，佛爭一爐香，Mr.Lie咁咄咄逼人，Mr.Tien絕地反擊，唔會令人驚奇！