新學期開學近1個月，大家覺得坐最後排嗰位留級生點呢？怕醜定霸道？巴甲法林明高嘅青年軍，最近亦嚟咗位「留級生」，佢就係前國腳肥哨朗拿度，不過聽講唔係好受歡迎。
隨法林明高青年軍操練
上周慶祝32歲生日嘅肥哨，陀住個大肚腩已夠突出，周一首課操練仲要戴住獨家藍色龜背，其他隊友就戴黃色；加上「豪華臀」及脹卜卜嘅腰圍，同十零廿歲嘅青年軍隊友差得遠，搞到在場記者一眼就認得出佢。由於當日亦係肥哨7個幾月首次掂波，所以表演慾特別旺盛，究竟玩咩呢？
原來肥哨學前幾年朗拿甸奴個連環中楣廣告，擺個波喺禁區外，然後不經意咁起腳，「嘭！」居然畀佢符碌連中3次！好專心練緊波嘅隊友，都好驚訝咁望晒過來，搞到肥哨不知幾得戚。之後，肥哨仲同體能教練打賭，如果其他人連續中楣多過3次，就輸800美元（約6,200港元）畀對方！
肥哨咁做係公然將隊友當骰仔咁搖，一啲都唔尊重其他人，而且亦擺明蝦後生仔射術不如自己，最後果然冇人贏到肥哨，不過正所謂後生可畏，難保呢班細路以後成就唔高得過你朗拿度！雖然肥哨之後冇問教練攞錢，不過佢呢仲懶勁、招積、霸道嘅態度，絕對係犯眾憎。
跑兩跑冇氣點復出
到咗禮拜二，肥哨照常參加操練，仲同班後生仔玩傳波。佢雖然基本功仲響度，不過轉身、走動就成個阿伯咁，而且冇幾耐就索晒氣；相反其他人就越跑越有力，到咗小型對抗賽，細哨已經無以為繼。所以呢，呢個世界千祈咪大蝦細，如果唔係盞自己無face啫！