陳見飛、吳亭欣噚日喺尖沙嘴扮印度西施幫商場做宣傳，喺洛杉磯住咗一段時間冇返香港嘅陳見飛，話喺美國都係見過細佬陳冠希（Edison）幾次。佢話：「佢𠵱家健身，都幾大隻，佢之前太瘦喇。」陳見飛仲話冇聽Edison講過想返香港，不過佢都掛住香港咁話。
陳冠希早排被發現喺紐約同潮人睇騷、拍拖同攬女，生活其實同香港一樣咁逍遙，陳見飛就話Edison喺美國非常用心學習，佢話：「佢OK，好勤力咁讀書，上啲演技課程、電腦設計，又睇好多書，佢𠵱家喺紐約一間學院度讀緊書，做兼職學生同做fashiondesigner。」
陳見飛又為Edison喺派對攬女解畫，佢話：「嗰日係我生日，求咗好耐先至叫到細佬飛過嚟LA陪我，啲女仔係朋友帶嚟嘅，我都唔熟，佢都係第一次見，佢好無辜，啲女仔話要影相，之前都講咗話影完唔好擺上facebook，後來都係擺咗，細佬平時都唔影相。」
同女友好開心
佢話可能係啲女仔upload上網想showoff。提到黃榕自稱曾同Edison一齊，仲話會繼續等佢，陳見飛話：「細佬冇承認過，我都冇見過佢哋一齊。」佢反而話Edsion同女友Vincy不知幾sweet，幾開心。