韓星權相佑同未婚妻孫泰英，嚟緊嘅星期日喺首爾新羅酒店行禮，佢哋已向350個圈中好友發喜帖。據知除咗權權嘅好友宋承憲之外，李秉憲、張東健同裴勇俊都會赴會，屆時韓流四大天王會聚首一堂。另外，權權落實同女星河知雲拍愛情片《我的愛在我身邊》。呢套係佢哋自電影《緣份的天梯》後相隔四年再合作，權權喺片中會身患絕症，大放催淚彈。