我花墟阿伯今早與幾個老波友飲早茶，席間談起和仔及招積忠，牛叔馬上拍桌爆粗。我先給他倒杯茶，再夾去一個叉燒包，然後說：「和仔頭長髮仲係亁如炒米粉，可見佢本性難移；招積既然講咗有病，唔通你要佢當眾轆地咬舌咩？」
我呷一口茶繼續說：「不過，今次也證明招積道行比和仔高很多，唔同層次。」急性子的牛叔說：「咩道行唔道行，講緊咩？」「和仔怒吼球證，最多係條紅辣椒；招積蠱惑知進退，係熬製過嘅香味咖喱。」
我花墟阿伯並非不信招積，而是他的戲演得太好。南華開季表現低於預期，他會上提出增援遭老闆當眾拒絕，顏面何存？有指他辭職是為保住評述員的飯票，但以他的面子不至於擔心沒工作？潘源良當時不也向有線請假一年嗎？
和仔道行不及招積
招積不愧是化妝才上鏡的評述員，他開記者會宣佈辭職那天，兩鬢和鬍子都看見點點雪花；加上強擠出來的笑容，滄桑之中帶點無奈；加上「我有癲癇症」的顫抖餘音，讓人怎狠心多做猜測？
和仔就是條紅辣椒，嗜辣者嫌他不夠辣，怕辣的對他敬而遠之。當打之年用球省球證，演變成足球史上少見的球證對打球員事件，震驚國際球壇。如今40歲之年仍然老馬有火，效法曼聯領隊費格遜以「吹風筒」聲襲球證，的確可圈可點。然而，和仔要成為成功的教練，光靠辣不行，還要學習招積的圓滑；別忘記費格遜再霸道，也有向C朗跪地哀求的時候。文：法比奧