神舟七號預計周四晚升空，香港傳媒終於可以去酒泉嘅衞星發射中心現場採訪。中央電視台宣佈，神七發射期間邀請咗台灣TVBS、香港無綫電視、同澳門嘅澳廣視，聯合製作直播節目，包括安排三家電視台嘅記者做現場採訪。
今次有港澳台記者獲批到場採訪，應該係首次准許非內地記者咁做。據聞無綫已經派出多個採訪隊，分別去酒泉、北京同神七降落嘅內蒙古四子王旗分頭採訪，至於係咪可以喺升空一刻做直播報道，就仍然傾緊。事關過往幾次發射，現場參觀嘅人都要熄手機，要升空之後至可以打電話，原因係北京當局擔心出錯，只想喺成功發射之後先至公佈消息。