豐田唱紅咗Echo（回音）幾年，06年第二代回音變奏，跟番歐洲版叫法Yaris，細車內櫳居然大過舊款Echo，成為揭背車新貴。今日搶試09Yaris，693公升尾廂同後排容量拍得住大牛龜SUV，令我聯想起10月有電影版上嘅《爆粗Band友》，望住車嘅真身，真係忍唔住要學DMC高歌：隊爆佢──個尾廂！
記者：徐影龍
攝影：林栢鈞
模特兒：Fion
好多人都話，做車主招呼人多過自用，唔係講笑，車主經常聽到嘅係──「去邊呀？兜埋我吖。」「阿媽入沙田還神，你載佢啦。」姨媽姑姐加埋女朋友屋企人，久唔久仲要當埋貨Van做柴可夫司機，揸住架細車的確好愁，除非你有本事買架雙門Coupe趕盡全人類啦。
幾年前揸過棍波同自動波Echo，想當年仲係四門房車天下，但預計到揭背細車一樣有運行。Yaris比第一代Echo更優勝之處，係後排同尾廂空間更可觀，唔似舊版咁只可二揀其一，舊版要坐四個人就唔可以擺行李，新版Yaris後排可以瞓平，跟大尾廂接軌，變出693公升更大空間。呢點唔止打贏一眾四門揭背車仔，連某啲大牛龜SUV都唔係佢手腳，莫講話接機送機呢啲濕碎Job，就算搬屋都仲得，想爆Yaris尾廂唔係咁易！女友Order多？唔緊要，用得唔好嘥，我呢個牛蒡男都要學Krauser二世唱：「~噚日接佢老竇，今日載埋佢老母，隊爆佢──個尾廂~」
估唔到要驚超速
睇規格，得80幾匹，裝得多嘢驚唔夠力喎。試車當日，雖然未爆Yaris尾廂，但全車連攝影哥哥同模特兒加埋五個人，都算Fullloading嘞啩？除咗試直路專登地台油試爆炸力嗰陣有啲力不從心，踩順咗其實幾好去，基本上城市路毋須刻意拖低波捱上斜，而且喺4,400rpm嚟Torque，喺高速公路行反而要留意錶板，事關好快自動升上高波，驚超速。
豐田副VVT-i偈威咗好耐，嚟到Yaris一樣發揮得到，扭力令人滿意，今時今日最緊要係耗油量，VVT-i加1,300cc已經係慳油格局，1,015kg車重亦只比的骰Lotus多少少，柔順慢慢揸大概每公里$1.2，由將軍澳入一轉屯門大四十幾蚊油錢，只比同廠油電雙絕嘅Prius貴少少。咁當然，你係要學Krauser二世玩成名絕技「一秒十次強姦」個油門，下下地台又低波就一定唔止$1.2啦，不過講明呀，並非Yaris唔慳油，係你自己嘥油咋。
Toyota09Yaris規格
引擎：1,299cc直四DOHC
馬力：85.7ps/6,000rpm
扭力：121Nm/4,400rpm
傳動：4前速自動波、5前速棍波
車價：自動波$145,260、棍波$138,240
查詢：皇冠車行（28661020）
